ჩინეთის სავაჭრო პროფიციტი $1 ტრილიონს უახლოვდება

ჩინეთის სავაჭრო პროფიციტმა გასულ თვეს მოლოდინს გადააჭარბა, რამაც ქვეყანას გასული წლის სარეკორდო მაჩვენებლის გაუმჯობესების შესაძლებლობა მისცა.

ჩინეთის საბაჟო სამსახურის მონაცემებით, სექტემბერში ექსპორტი წლიურად 36.3%-ით გაიზარდა, რაც აგვისტოს 25%-იან მაჩვენებელსა და ანალიტიკოსების 25.5%-იან პროგნოზს საგრძნობლად აღემატება. პარალელურად, იმპორტი 31%-ით გაიზარდა და პროგნოზირებულ 24.5%-ს გადააჭარბა.

როგორც ირკვევა, მიმდინარე წლის პირველ ცხრა თვეში სავაჭრო პროფიციტმა $938.1 მილიარდს მიაღწია. თუ ექსპორტის ტემპი მკვეთრად არ შემცირდება, მაშინ ქვეყანა $1-ტრილიონიან ნიშნულს მოსალოდნელზე ადრე გადალახავს.

სექტემბერში სავაჭრო პროფიციტმა $133.53 მილიარდი შეადგინა. ამ შედეგის მიღწევა შეერთებულ შტატებთან არსებულმა $34-მილიარდიანმა და ევროკავშირთან დაფიქსირებულმა $34.8-მილიარდიანმა პროფიციტმა განაპირობა.

ექსპორტის ზრდას კვლავ მაღალტექნოლოგიური პროდუქცია და ავტომობილები განაპირობებს – პირველ ცხრა თვეში ნახევარგამტარების ექსპორტი 108%-ით გაიზარდა, ხოლო ავტომობილების ექსპორტის მაჩვენებელმა 50%-ს გადააჭარბა.

პროფიციტის ზრდა იმაზე მიუთითებს, რომ ქვეყანას ექსპორტზე უფრო მეტი საქონელი გააქვს, ვიდრე იმპორტით შემოაქვს.