Comcast-მა NBCUniversal-ისა და Sky-ს ცალკე გამოყოფა გადაწყვიტა

მედიაჰოლდინგ Comcast-ის ხელმძღვანელობამ მედიააქტივების, NBCUniversal-ისა და Sky-ს დამოუკიდებელ საჯარო კომპანიად გამოყოფის გეგმა ოფიციალურად წარადგინა.

როგორც ირკვევა, ახალი დამოუკიდებელი ერთეული Universal Pictures-ის კინოსტუდიას, ტელეარხებს (NBC, Telemundo, NBC News, Bravo), სტრიმინგპლატფორმა Peacock-ს, გასართობ პარკებსა და ბრიტანულ სამაუწყებლო კომპანია Sky-ს გააერთიანებს.

ამასთან, თავად Comcast-ი ბიზნეს და საცალო მომხმარებლებისთვის ფართოზოლოვანი, საკაბელო და უსადენო კავშირის მიწოდებაზე გაამახვილებს ყურადღებას. კომპანიის განცხადებით, ეს სტრატეგია დამოუკიდებელ სტრუქტურებს საკუთარი პრიორიტეტების ეფექტიანად განსაზღვრისა და აქციონერებისთვის გრძელვადიანი ღირებულების შექმნის შესაძლებლობას მისცემს.

რაც შეეხება მენეჯმენტს, ახალ NBCUniversal-ს Comcast-ის მოქმედი თანააღმასრულებელი დირექტორი, მაიკ კავანა უხელმძღვანელებს, ხოლო Comcast-ის მართვას ყოფილი ფინანსური დირექტორი, მაიკლ ანგელაკისი დაუბრუნდება. პარალელურად, ორივე კომპანიის ლიდერებთან აქტიურ თანამშრომლობას Comcast-ის დირექტორთა საბჭოს თავმჯდომარე, ბრაიან რობერტსი გააგრძელებს. მისი თქმით, გამოყოფის პროცესი დაახლოებით ერთ წელში დასრულდება, რის შემდეგაც Comcast-ი ახალ კომპანიაში 19.9%-მდე წილს შეინარჩუნებს.

რაც შეეხება რეაქციას საფონდო ბირჟაზე, წინა სავაჭრო სესიის დახურვისას Comcast-ის აქციების ფასი 4.5%-ით გაიზარდა, რაც იმას ნიშნავს, რომ ეს სიახლე ინვესტორებმა პოზიტიურად მიიღეს.