„დაირღვა რეჟიმი და დაიშალა მთლიანად ენერგოსისტემა“ - ენგურჰესის დირექტორი

საქართველოში ელექტროენერგიის მასშტაბური გათიშვა 500-კილოვატიანი ხაზის „იმერეთის“ გამორთვამ გამოიწვია - ამის შესახებ „ტვ პირველს“ „ენგურჰესის“ დირექტორმა, ლევან მებონიამ განუცხადა.

მისი განმარტებით, სწორედ ამ ხაზზეა დამოკიდებული მთელი საქართველოს ელექტრომომარაგება. ლევან მებონია ამ ეტაპზე ვერ ამბობს, თუ რამ გამოიწვია აღნიშნული ხაზის დაზიანება.

„ხაზი გამოირთო 500 კილოვატიანი "იმერეთი", ვაერთებთ აგრეგატებს და აღდგება მალე. ძირითადი დატვირთვა ენგური უკავშირდება ელექტრონულ სისტემას ზესტაფონამდე. ძალიან დიდი ტვირთი გადიოდა - რომ გამოირთო, დაირღვა რეჟიმი და დაიშალა მთლიანად ენერგოსისტემა. ავარიის აღდგენის პროცესში ვართ“, - აცხადებს „ენგურჰესის“ დირექტორი.

აღსანიშნავია, რომ ელექტროენერგია პარალელურად ოკუპირებულ აფხაზეთსაც შეუწყდა.

ცნობისთვის, საქართველოს მასშტაბით ელექტროენერგიის მიწოდება დილის 08:00 საათიდან შეწყდა.

„საქართველოს სახელმწიფო ელექტროსისტემის“ განცხადებით, ამ დროისთვის აბონენტებს ელექტროენერგიის მიწოდება უკვე აღუდგათ. უწყებაში აცხადებენ, რომ ავარიის ზუსტი მიზეზები, რამაც სისტემის სრული გათიშვა გამოიწვია, ამ ეტაპზე უცნობია. ჯერ კიდევ უცნობია ისიც, რამ გამოწივია დენის გათიშვა 24 ივლისის ღამეს.