დაიწიოს განბაჟების 300-ლარიანი ზღვარი ან ადგილობრივი რითეილერებიც გავთავისუფლდეთ დღგ-სგან - კახა ხაზარაძე
ICR ჯგუფის სამეთვალყურეო საბჭოს თავმჯდომარე კახა ხაზარაძე საერთაშორისო ონლაინ პლატფორმების ექსპანსიასა და საქართველოში არსებულ განბაჟების 300-ლარიან შეღავათს ბიზნესისთვის მთავარ გამოწვევად მიიჩნევს. ბიზნესმენის განცხადებით, არსებული მდგომარეობა არათანაბარ პირობებში აყენებს ადგილობრივ რითეილერებსა და საერთაშორისო „მარკეტფლეისებს“.
კახა ხაზარაძე BMG-სთან განმარტავს, რომ ადგილობრივი იმპორტიორები ნებისმიერი ღირებულების პროდუქციაზე დამატებული ღირებულების გადასახადს იხდიან, 300 ლარამდე ღირებულების ამანათები კი ამ გადასახადისგან თავისუფლდება. მისი თქმით, გამოწერების 80% სწორედ ამ ზღვარს ქვემოთ ხდება, რაც ბიუჯეტისთვის მნიშვნელოვანი დანაკარგია.
„ეს პრობლემები სანამ ჩვენ შეგვექმნებოდა, ევროპასაც შეექმნა, თუმცა მათ მარტივი გადაწყვეტილებები მიიღეს - თუ არ ვცდები, 20 ევროზე მაღალი ღირებულების ამანათზე განბაჟების ფორმატი შემოიღეს და ამით ერთნაირ პირობებში ჩააყენეს არსებული რითეილერები, იმ კომპანიებთან, რომლებიც ამ გამოწერით, უფრო სასათბურე პირობებში იმყოფებიან.
ჩვენ იმპორტიორები, რითეილერები, განბაჟების ნაწილში, ნებისმიერი ინვოისის ღირებულებიდან დღგ-ს ვიხდით. ე.წ. „მარკეტფლეისის“ ბრუნვა კი კატასტროფულად იზრდება - მე როგორც ვიცი, 40-50%-ით გაიზრდება წელს, ანუ ჩათვალეთ, რომ ამ პროდუქციის 80%-ზე ქვეყანა დღგ-ს დაკარგავს.
საბოლოოდ, ქვეყანა კარგავს შემოსავალს იქიდან გამომდინარე, რომ იმ პროდუქციას, რომელსაც ჩვენ აქ არსებული რითეილერები ვყიდით, სხვა კომპანია ჩაანაცვლებს, ჩვენ ნაკლებს გავყიდით და შესაბამისად, დღგ-ს სახით სახელმწიფო შემოსავალს დაკარგავს. ეს არა მარტო დღგ-ია - ეს გამოიწვევს შემდეგ სავაჭრო ობიექტების შემცირებას, სადაც არენდის შემოსავლებიდან სახელმწიფო გადასახადს იღებს, გამოიწვევს პერსონალის შემცირებას - სადაც, საშემოსავლო გადასახადია და კომპლექსურად, ბიუჯეტი ზარალდება ამ პროცესისგან.
უნდა არსებობდეს სამართლიანი თამაშის წესები და ნებისმიერი კომპანია - გარეთ მყოფი ე.წ. მარკეტფლეისი თუ სხვა ონლაინ კომპანიები, რომლებიც დღეს იყენებენ და საქართველოს ბაზარზე ამა თუ იმ პროდუქციას ყიდიან, თანაბარ პირობებში უნდა იყვნენ ჩაყენებული“, - აცხადებს კახა ხაზარაძე BMG-სთან.