დანერგილია შიში, რომ ბიზნესი უნდა იყოს ჩუმად და არაფერზე ჰქონდეს პოზიცია|"ბიზნესის დუმილის" კანონი საკონსტიტუციოში გაასაჩივრეს

ფიტნეს-კლუბ „რეფორმერისა“ და აპარტ-ოტელ „ლიბერესოს“ დამფუძნებელმა, ბიზნესმენმა გიორგი ფუტკარაძემ საქართველოს საკონსტიტუციო სასამართლოში გაასაჩივრა კანონი, რომლითაც მეწარმე სუბიექტებს „საჯარო პოლიტიკური აქტივობა“ აეკრძალათ.

მეწარმე და მისი უფლების დამცველები მიიჩნევენ, რომ ადმინისტრაციულ სამართალდარღვევათა კოდექსის 153¹³-ე მუხლი და სისხლის სამართლის კოდექსის 355³-ე მუხლი არაკონსტიტუციურია, რადგან ზღუდავს გამოხატვის და მეწარმის თავისუფლებას, ამიტომ უნდა გაუქმდეს.

საქმე ის არის, რომ საქართველოს სისხლის სამართლის კოდექსში 2026 წლის 4 მარტს განხორციელებული ცვლილებებით, სისხლისსამართლებრივად დასჯადი გახდა მეწარმე იურიდიული პირის მიერ და ამ იურიდიული პირის პასუხისმგებელი პირის მიერ ამავე იურიდიული პირის სახელით ან ამ სახელის მეშვეობით (გამოყენებით) “საჯაროდ ისეთი პოლიტიკური აქტივობის განხორციელება, რომელიც არ არის დაკავშირებული ამ იურიდიული პირის ძირითად სამეწარმეო საქმიანობასთან”.

საკონსტიტუციო სასამართლოს სარჩელის არსებითად განხილვაზე მისაღებად 9-თვიანი ვადა აქვს.

გიორგი ფუტკარაძის განცხადებით, კანონის განმარტებით ბარათში არსად არის ნაჩვენები რეალური მოტივაცია, თუ რა „დააშავა“ ბიზნესმა, რომ მის წინააღმდეგ მსგავსი მკაცრი სანქციების დაწესება გახდა საჭირო. ბიზნესმენი მიიჩნევს, რომ ხელისუფლების მიზანი კრიტიკული აზრის პრევენციული ჩახშობაა.

"კანონის განმარტებით ბარათში არსად წერია მოტივაცია, თუ რა გააფუჭა ბიზნესმა ქვეყანაში, რომ ასეთი მკაცრი ზომების მიღება გახდა საჭირო. ერთადერთი ვარაუდის საფუძველს ის იძლევა, რომ ალბათ ბიზნესისგან გამოთქმული კრიტიკა ქვეყანაში უფრო ხმამაღლა ისმის და საზოგადოებაც მასზე სხვანაირად რეაგირებს.

შესაბამისად, სახელმწიფომ ჩათვალა, რომ თუ ბიზნესი მასობრივად გამოთქვამს პროტესტს კონკრეტულ საკითხებზე, მათი რეპუტაციიდან გამომდინარე, ამას საზოგადოებრივ აზრზე უფრო მეტი გავლენა ექნება და მიიჩნევენ, რომ ეს საფრთხეს შეუქმნის მათ ძალაუფლებას", - აცხადებს გიორგი ფუტკარაძე "ნეტგაზეთთან".