"დაუწესდეს სანქციები ივანიშვილს და მის გარემოცვას" - საფრანგეთის ეროვნულმა ასამბლეამ საქართველოზე რეზოლუცია მიიღო

საფრანგეთის ეროვნულმა ასამბლეამ მიიღო რეზოლუცია, რომელიც საფრანგეთის მთავრობას ბიძინა ივანიშვილისა და მისი გარემოცვის სანქცირებისკენ მოუწოდებს.

საფრანგეთის პარლამენტის ქვედა პალატის მიერ 2026 წლის 11 მაისს მიღებული რეზოლუციის მიზანია დაგმოს საქართველოს მთავრობის არალიბერალური და ავტორიტარული კურსი და ამავდროულად დაადასტუროს მხარდაჭერა საქართველოს ევროპული მომავლისა და ქართველი ხალხისადმი.

რეზოლუციაში ნახსენებია ბიძინა ივანიშვილის ნეგატიური როლი ქვეყნის პოლიტიკურ განვითარებაში. საფრანგეთის მთავრობას მოუწოდებენ, ევროპელ პარტნიორებთან კოორდინაციით, დააწესოს ინდივიდუალური სანქციები ბიძინა ივანიშვილისა და მისი გარემოცვის წინააღმდეგ. ასევე, მოთხოვნილია გადაიხედოს ივანიშვილისთვის გადაცემული საფრანგეთის საპატიო ლეგიონის ორდენის საკითხი და განიხილონ ამ ჯილდოს ჩამორთმევა.

ეროვნული ასამბლეა მკაცრად გმობს საქართველოს ხელისუფლების ავტორიტარულ კურსს, ადამიანის უფლებების დარღვევას და გამოხატვისა და შეკრების თავისუფლების შეზღუდვას.

ხაზგასმულია, რომ 2024 წლის 26 ოქტომბრის საპარლამენტო არჩევნები ჩატარდა დარღვევებით (ადმინისტრაციული რესურსის ბოროტად გამოყენება, ზეწოლა ამომრჩეველზე).

დოკუმენტი მოითხოვს "უცხოური გავლენის" შესახებ კანონისა და სხვა რეპრესიული ნორმების გაუქმებას, რომლებიც ზღუდავს სამოქალაქო საზოგადოებასა და მედიას.

რეზოლუცია მხარს უჭერს საქართველოს ევროკავშირში გაწევრიანების პროცესის შეჩერებას მანამ, სანამ ქვეყანა არ დაუბრუნდება დემოკრატიულ სტანდარტებს.

მიუხედავად ხელისუფლების კრიტიკისა, დოკუმენტი სრულ სოლიდარობას უცხადებს ქართველ ხალხს, რომელიც იბრძვის ევროპული მომავლისთვის. რეზოლუცია მოუწოდებს ევროკავშირს, დახმარება მიმართოს პირდაპირ სამოქალაქო საზოგადოების, დამოუკიდებელი მედიისა და აკადემიური წრეების გაძლიერებისკენ.

რეზოლუცია მოითხოვს ყველა პოლიტპატიმრის, მათ შორის ოპოზიციის ლიდერებისა და ახალგაზრდა მომიტინგეების დაუყოვნებლივ გათავისუფლებას. გამოთქმულია შეშფოთება მომიტინგეების წინააღმდეგ ძალის გადამეტებით გამოყენებასა და აკრძალული ნივთიერებების სავარაუდო გამოყენებაზე, რაზეც საერთაშორისო გამოძიებას უჭერენ მხარს.

დოკუმენტი გამოთქვამს შეშფოთებას, რომ საქართველო შესაძლოა გამოიყენებოდეს რუსეთისთვის დაწესებული საერთაშორისო სანქციების გვერდის ავლის პლატფორმად. ის მოუწოდებს ევროკავშირს, სანქციების მომდევნო პაკეტში შეიყვანოს ზომები, რომლებიც აღკვეთს საქართველოს გავლით სანქციების გვერდის ავლის მცდელობებს.

საფრანგეთი კიდევ ერთხელ ადასტურებს მხარდაჭერას საქართველოს სუვერენიტეტისა და ტერიტორიული მთლიანობის მიმართ.

საფრანგეთის ეროვნულ ასამბლეაში საქართველოს შესახებ რეზოლუციის განხილვას საქართველოს მეხუთე პრეზიდენტი სალომე ზურაბიშვილი დაესწრო.

View this post on Instagram A post shared by Salome Zourabichvili (@salome_zourabichvili)