დავით სონღულაშვილმა რძის პროდუქტების მწარმოებლებთან ბაზრის რეგულირების ახალი გეგმა განიხილა
გარემოს დაცვისა და სოფლის მეურნეობის მინისტრი რძის პროდუქტების მწარმოებლებს შეხვდა. როგორც უწყების პრეს-რელიზშია აღნიშნული, სამინისტროში ნედლი რძის წარმოების წახალისებისა და ბაზრის რეგულირების მიზნით შემუშავებული ახალი გეგმის სამუშაო განხილვა გაიმართა.
„ეს პროცესი აბსოლუტურად ღიაა და ჩვენ მზად ვართ დისკუსიისთვის, რათა ბაზარი მთლიან ჯაჭვში, მიწოდებისა და მოხმარების ნაწილში ერთნაირად მოვაწესრიგოთ. ჩვენი მიზანია მომხმარებელმა მკაფიოდ განასხვაოს პროდუქტები და იყოს ინფორმირებული, რას ყიდულობს. არ ვზღუდავთ არცერთ პროდუქტს, პირიქით, ვაძლიერებთ ქართულ რძის სექტორს და ვეხმარებით ფერმერებს განვითარებაში. მნიშვნელოვანია როგორც მიწოდების, ისე მოხმარების ბაზრის მოწესრიგება და ფერმერული მეურნეობების განვითარება. ვზრდით სახელმწიფოს თანამონაწილეობას და ვუჭერთ მხარს ფერმერებს, რათა მცირე მეურნეობებიდან გადავიდეთ უფრო განვითარებულ, თანამედროვე ტიპის ფერმერულ მეურნეობებზე“, - აღნიშნა დავით სონღულაშვილმა.
რეფორმის ფარგლებში იგეგმება ნებაყოფლობითი ხარისხის ნიშნის (პიქტოგრამის) დანერგვა, რომელიც მომხმარებელს მიანიშნებს, რომ პროდუქტი 100%-ით ქართული ნედლი რძისგან არის დამზადებული. ასევე სავალდებულო გახდება მცენარეული ცხიმის შემცველი პროდუქტების მკაფიო ვიზუალური მარკირება როგორც ადგილობრივ, ისე იმპორტირებულ ნაწარმზე. სავაჭრო ქსელებში აღნიშნული პროდუქტები განცალკევებულად განთავსდება.
სამინისტროს ცნობით, გეგმის მნიშვნელოვანი ნაწილი ეთმობა სახელმწიფო კონტროლის გაძლიერებას. სურსათის ეროვნული სააგენტო გაამკაცრებს მონიტორინგს HoReCa სექტორში, აგრარულ ბაზრებსა და სადისტრიბუციო ქსელებში. ასევე გადაიხედება შესაბამისი რეგულაციები, რათა თავიდან იქნას აცილებული რეგისტრაციის სტატუსის არასათანადო გამოყენება. პარალელურად, სახელმწიფო ხელს შეუწყობს ქართული ტრადიციული პროდუქტების, მათ შორის ყველისა და მაწვნის გეოგრაფიული აღნიშვნებისა და ადგილწარმოშობის დასახელებების პოპულარიზაციას.
როგორც სამინისტრო იტყობინება, რძისა და რძის პროდუქტების მწარმოებელთა ასოციაციის წარმომადგენლები მხარს უჭერენ ინიციატივას და მზად არიან პროცესში აქტიური ჩართულობისთვის.
