დაზღვეული დეპოზიტების ზედა ზღვარი 2-ჯერ, 100 000 ლარამდე იზრდება

დაზღვეული დეპოზიტების ზედა ზღვარი ორმაგდება.

უფრო კონკრეტულად, დეპოზიტების დაზღვევის სააგენტოს უფროსის ბრძანებით სადაზღვევო თანხის მაქსიმალური ზღვარი 100 000 ლარი იქნება. ეს ზღვარი დღევანდელი მდგომარეობით, 50 000 ლარს შეადგენს.

დოკუმენტის მიხედვით, ცვლილებები ძალაში 2027 წლის პირველი იანვრიდან შევა.

შეგახსენებთ, რომ დეპოზიტების დაზღვევის სისტემა საქართველოში 2018 წლის იანვრიდან ამოქმედდა. თავდაპირველად დეპოზიტის მფლობელისთვის ასანაზღაურებელი დაზღვეული დეპოზიტის ანაზღაურებადი თანხის მაქსიმალურ ოდენობად 5 ათასი ლარი განისაზღვრა; 2020 წლის ივლისიდან ეს ზღვარი 15 ათასამდე გაიზარდა, 2024 წლის 1-ელი იანვრიდან 30 ათასი ლარი გახდა, ხოლო 2025 წლის აპრილიდან 50 000 ლარი.

აღსანიშნავია, რომ დეპოზიტების დაზღვევის სისტემის შესახებ’’ კანონის მიხედვით, ბანკებმა 2026 წლის აგვისტოს თვისთვის ფონდში 7,297,690 ლარი შეიტანეს. ჯამში ფონდში 360 მლნ -ის აკუმულირება მოხდა.