დიდი ბრიტანეთი გახდა პირველი ქვეყანა, რომელმაც რუსეთის ათივე უმსხვილეს ნავთობმწარმოებელს სანქციები დაუწესა

დიდი ბრიტანეთი გახდა მსოფლიოში პირველი ქვეყანა, რომელმაც რუსეთის ათივე უმსხვილეს ნავთობმწარმოებელს სანქციები დაუწესა. ბრიტანეთის მთავრობის განცხადებით, ლონდონმა სასანქციო სიაში კომპანია Slavneft-ი 12 ნოემბერს დაამატა და ათეული ამით შეკრა.

ინფორმაციისთვის, მანამდე ბრიტანული შეზღუდვები რუსულ ნავთობგიგანტებს - Rosneft-ს, Lukoil-ს, Gazprom Neft-ს, Surgutneftegas-სა და მის შვილობილ კომპანია Bashneft-ს უკვე შეეხო. ამას გარდა, ლონდონმა შავ სიაში მსხვილი დამოუკიდებელი და სახელმწიფოსთან დაკავშირებული მწარმოებლები - Tatneft-ი, Russneft-ი, Zarubezhneft-ი და INK Capital-ი ადრევე შეიყვანა.

როგორც ირკვევა, ახალი სასანქციო პაკეტი ნავთობისა და თხევადი ბუნებრივი აირის გადამზიდ "ჩრდილოვანი ფლოტის" გემებს, ნახშირის მსხვილ კომპანიებსა და Rosneft-ის კუთვნილ არქტიკულ პროექტ Vostok Oil-საც მოიცავს.

ბრიტანეთის მთავრობის განმარტებით, შეზღუდვები რუსეთის ნავთობისა და გაზის სექტორებში შემოსავლების გენერირების თითქმის ყველა დონეს - მომპოვებელ კომპანიებს, სავაჭრო ქსელებს, მიწოდების ჯაჭვებსა და საზღვაო ტრანსპორტს ეხება.

ამ ზომების მიზანი კი არის, რომ მოსკოვს ენერგორესურსების ექსპორტიდან შემოსავლების მიღება და უკრაინაში სრულმასშტაბიანი ომის დაფინანსება კიდევ უფრო შეეზღუდოს.

"უკრაინის შესახებ სამშვიდობო მოლაპარაკებები წინ წავიდა, თუმცა ახლა თვითკმაყოფილების დრო არ არის. ჩვენ რუსეთზე ზეწოლის გაზრდა უნდა გავაგრძელოთ, რათა ის ცეცხლის სრულ და დაუყოვნებლივ შეწყვეტას დათანხმდეს", - განაცხადა დიდი ბრიტანეთის პრემიერ-მინისტრმა ენდი ბერნემმა.

მან აღნიშნა, რომ ახალი შეზღუდვები რუსეთის სანავთობო შემოსავლებზე ზეწოლის გაძლიერებასა და ომის დასრულების ხელშეწყობას ისახავს მიზნად. ბრიტანეთის პრემიერმა ისიც დასძინა, რომ სამშვიდობო მოლაპარაკებების პარალელურად რუსეთზე ზეწოლის გაგრძელება და უკრაინისთვის იურიდიულად სავალდებულო უსაფრთხოების გარანტიების უზრუნველყოფა აუცილებელია.

ცნობისთვის, დიდმა ბრიტანეთმა რუსეთის წინააღმდეგ სანქციები 1 ოქტომბერსაც გააფართოვა. მაშინ ლონდონმა სასანქციო სიაში 31 ახალი სუბიექტი და ობიექტი, მათ შორის რუსული თხევადი ბუნებრივი აირის გადამზიდი "ჩრდილოვანი ფლოტის" გემები შეიყვანა.