დმანისი-საფარლოს გზის 15-კილომეტრიან მონაკვეთს 12.5 მლნ ლარად რეაბილიტაცია უტარდება - რა ეტაპზეა?

დმანისის მუნიციპალიტეტში, სოფელ საფარლოდან ქალაქ დმანისამდე მისასვლელი ადგილობრივი მნიშვნელობის საავტომობილო გზის რეაბილიტაცია მიმდინარეობს. ინფრასტრუქტურის სამინისტროს საავტომობილო გზების დეპარტამენტის ცნობით, სამუშაოები 14.9-კილომეტრიან მონაკვეთს მოიცავს.

უწყების ინფორმაციით, არსებულ გზაზე ასფალტ-ბეტონის საფარი დაზიანებული იყო, რის გამოც ინფრასტრუქტურა სრულ განახლებას საჭიროებდა.

პროექტის ფარგლებში იგეგმება:

• 14.9 კმ-იან მონაკვეთზე ბეტონის საფარის დაგება; • მოსახლეობის ეზოებში შესასვლელების მოწყობა; • წყალგამტარი მილების, კიუვეტებისა და გაბიონების დამონტაჟება; • საგზაო ნიშნების, შემოფარგვლისა და საგზაო მონიშვნების უზრუნველყოფა.

ინფრასტრუქტურული პროექტი სახელმწიფო ბიუჯეტიდან ფინანსდება და მისი ჯამური ღირებულება 12.5 მილიონ ლარამდეა.