დონალდ ტრამპმა ევროკავშირს სავაჭრო შეთანხმების რატიფიცირებისთვის ვადა 4 ივლისამდე მისცა
აშშ-ის პრეზიდენტმა, დონალდ ტრამპმა ევროკავშირს სავაჭრო შეთანხმების რატიფიცირებისთვის საბოლოო ვადად 4 ივლისი განუსაზღვრა. წინააღმდეგ შემთხვევაში, თეთრი სახლის ლიდერი ბლოკს ტარიფების მკვეთრი გაზრდით დაემუქრა. როგორც ირკვევა, ტრამპმა აღნიშნული საკითხი ევროკომისიის პრეზიდენტთან, ურსულა ფონ დერ ლაიენთან უკვე განიხილა. პრეზიდენტის განცხადებით, თუ ევროპული მხარე ვალდებულებებს აშშ-ის დამოუკიდებლობის 250-ე წლისთავამდე არ შეასრულებს, იმპორტირებულ საქონელზე გადასახადები დაუყოვნებლივ გაიზრდება.
ამასთან, ტრამპმა Truth Social-ზე გამოქვეყნებულ პოსტში უკმაყოფილება შეთანხმების იმპლემენტაციის ტემპის გამოც გამოხატა. მისი თქმით, ევროკავშირმა პირობა დადო, რომ ტარიფებს ნულამდე შეამცირებდა, თუმცა პროცესი ამ დრომდე ჭიანურდება. აღსანიშნავია, რომ მხარეებმა სავაჭრო გარიგებას გასულ წელს მიაღწიეს, რაც ევროპული საქონლის უმეტესობაზე გადასახადის 15%-მდე შემცირებას ითვალისწინებდა. თუმცა, პრეზიდენტი აცხადებს, რომ ევროპული მხარე "ისტორიული შეთანხმების" პირობებს არ ასრულებს.
საყურადღებოა, რომ ვითარება აშშ-ის უზენაესი სასამართლოს თებერვლის გადაწყვეტილებამაც გაართულა. სასამართლომ დაადგინა, რომ ტრამპმა ტარიფების დაწესებისას უფლებამოსილებას გადააჭარბა, რის გამოც ამჟამად დროებითი 10%-იანი ბაჟი მოქმედებს. მიუხედავად ამისა, აღნიშნული გადაწყვეტილება არ შეხებია ავტომობილებზე დაწესებულ 15%-იან გადასახადს. პრეზიდენტი იმუქრება, რომ თუ შეთანხმება არ დამტკიცდება, ევროპულ ავტომობილებსა და სატვირთოებზე ტარიფს 25%-მდე გაზრდის.
პარალელურად, ურსულა ფონ დერ ლაიენმა განაცხადა, რომ ბლოკმა შეთანხმების რატიფიცირებისკენ მნიშვნელოვან პროგრესს მიაღწია. მისი თქმით, ორივე მხარე პროცესის დასრულებისთვის ძალისხმევას არ იშურებს. კვიპროსი, რომელიც ევროკავშირის საბჭოს თავმჯდომარე ქვეყანაა, იმედოვნებს, რომ პროცესი მალე დასრულდება. მნიშვნელოვანია ითქვას, რომ მარტში ევროპარლამენტმა მხარი დაუჭირა იმ დოკუმენტს, რომლის საბოლოო იმპლემენტაციისთვის წევრი ქვეყნების თანხმობაა საჭირო.