„დრო სწორად შევარჩიეთ“ - საქართველოში Starbucks-ის პირველი კაფე ოფიციალურად გაიხსნა
საერთაშორისო ყავის ქსელმა Starbucks-მა საქართველოში პირველი ფილიალი ოფიციალურად გახსნა. Alshire Group-ის CEO ჯონ ჰადენი ამბობს, რომ ბრენდი ქართულ ბაზარზე შემოსვლას მრავალი წლის განმავლობაში განიხილავდა, თუმცა გადაწყვეტილება ახლა მიიღო, რადგან მიიჩნევს, რომ ამისთვის შესაბამისი დრო დადგა.
მისივე თქმით, კომპანიამ საქართველოში ყავის კულტურის განვითარება, მომხმარებელთა ინტერესი და ბრენდის მიმართ დადებითი დამოკიდებულება დაინახა.
„დღეს საქართველოში, თბილისში, პირველ მაღაზიას ვხსნით. ეს ძალიან ლამაზი სივრცეა და მათ, ვისაც ჯერ არ უნახავს, ვურჩევ, დაათვალიერონ. მოხარულები ვართ, რომ აქ ვართ. ამ ბაზარზე შემოსვლას მრავალი წლის განმავლობაში განვიხილავდით, ვხედავდით არაერთ შესაძლებლობას, თუმცა ვიგრძენით, რომ სწორედ ახლა იყო ამისთვის შესაფერისი დრო. აქ არის ყავის მომხმარებელი, ჩვენი ბრენდის მიმართ სიყვარული. ამიტომ გადავწყვიტეთ, რომ სწორედ ახლა იყო საქართველოში შემოსვლის დრო“, – განაცხადა ჰადენიმ.
მისივე ინფორმაციით, Starbucks-ი გაფართოებას უკვე გეგმავს და პირველ ეტაპზე ახალი ობიექტები თბილისში გაიხსნება.
„პირველ ეტაპზე საქმიანობას თბილისში დავიწყებთ. მომდევნო 12-18 თვის განმავლობაში აქ კიდევ რამდენიმე ობიექტს გავხსნით, შემდეგ კი იმედი გვაქვს, საქართველოს სხვა ქალაქებშიც გავალთ. თუმცა, ამ ეტაპზე მთავარი აქცენტი სწორედ დღევანდელ დღეზე და ამ კონკრეტულ მაღაზიაზეა. ძალიან ბედნიერები ვართ, რომ საქართველოში ვართ“, – აღნიშნა მან.
შეგახსენებთ, საქართველოში კომპანიის ოპერატორი ახლო აღმოსავლეთისა და თურქეთის რეგიონში Starbucks-ის ფრენჩიზის მფლობელს, ქუვეითურ კონგლომერატ Alshaya group-ია, უშუალოდ საქართველოს ბაზარზე კი მის ოპერირებაზე თურქეთის ოფისი იქნება პასუხისმგებელი. თავად თურქეთში Alshaya Group-ი Starbucks-ის 685 ობიექტს მართავს.
თავად Alshaya Group-ი ქუვეითის ერთ-ერთი უმსხვილესი მულტიბრენდული ჰოლდინგია, რომელიც ახლო აღმოსავლეთის, ჩრდილოეთ აფრიკის, ევროპისა და თურქეთის ბაზრებზე ფლობს ისეთი ბრენდების ფრენშიზულ ლიცენზიებს, როგორიცაა Chipotle, Starbucks, H&M, New Balance, MAC, Body Shop, American Eagle-ს და სხვა ბრენდებს. ასევე სასტუმროების ქსელ Hampton-ს.