ეკონომისტები ხსნიან, როგორ "ეხმარება" ფულის გათეთრება ეკონომიკის ზრდას
11 ივნისს ცნობილი გახდა, რომ პროკურატურამ უცხოურ სპეცსამსახურებთან ერთად ასეულობით მილიონი დოლარის კრიპტოვალუტის გათეთრების ტრანსნაციონალური დანაშაული გახსნა. უწყების ცნობით, ყადაღა დაედო 173 ერთეულ სატრანსპორტო საშუალებას, რომლებიც სავარაუდოდ, უკანონო შემოსავლის ლეგალიზაციის მიზნით იყო შეძენილი, ძვირად ღირებულ უძრავ ქონებებს, საბანკო ანგარიშებზე განთავსებულ თანხებს. შსს-ს ოფიციალური სტატისტიკით, 2025 წელს უკანონო შემოსავლის ლეგალიზაციის (ფულის გათეთრება) 58 შემთხვევა გამოვლინდა. აღსანიშნავია, რომ სწორედ გასულ წელს გამოვლინდა 2022-2024 წლებში განხორციელებული, უპრეცედენტო ოდენობის - 624 მილიონი აშშ დოლარის და 35 მილიონი ევროს უკანონო შემოსავლის ლეგალიზაციის ფაქტიც. ამასთან, 2025 წელს უკანონო შემოსავლის ლეგალიზაციის საქმეებში, სასამართლოს მიერ გამოტანილი განაჩენის საფუძველზე, 19.4 მილიონი ლარის კრიპტოვალუტაა ჩამორთმეული.
BM.GE დაინტერესდა, მსგავსი დანაშაულები, რომლებიც დაკავშირებულია რამდენიმე ასეული მილიონი დოლარის გათეთრებასთან, ანუ უკანონო საქმიანობით მიღებული ფულისთვის კანონიერი შემოსავლის სახის მიცემასთან, რამდენად მოქმედებს ეკონომიკური ზრდის მაჩვენებელზე.
ეკონომისტი აკაკი ცომაია BM.GE-სთან ამბობს, რომ ეკონომიკურ ზრდაზე პირდაპირ აისახება ფულის გათეთრების ნებისმიერი მცდელობა.
"შავი ფული, რომელიც შემოდის და შემდგომ ხდება მისი გათეთრება, ვთქვათ, უძრავი ქონების შეძენა ან ბანკში დეპოზიტის სახით დადება, რესტორანში დახარჯვა თუ ასე შემდეგ, მნიშვნელობა არა აქვს, აისახება სტატისტიკაში, რადგან ზრდის დანახარჯებს ან მოხმარების კომპონენტი გაიზრდება, ან ინვესტიციების კომპონენტი და ამ გზით შესაბამისად, ეს მთლიან შიდა პროდუქტზე, რა თქმა უნდა, მოახდენს გავლენას. გათეთრების მასშტაბები რაც უფრო დიდია, მით უფრო მეტად მოახდენს, ცხადია, გავლენას. მხოლოდ ის ფაქტი, რომ ერთ დღეს 600 მილიონი დოლარის კონვერტირება მოხდა ერთ სავალუტო პუნქტში, მიუთითებს მასშტაბებზე და აქედან, ცხადია, რაღაც ნაწილი რომ თეთრდება და ლეგალიზდება, მათ შორის, ამით აიხსნება ეკონომიკური ზრდის შედარებით მაღალი ტემპი. ჩათვალეთ, რომ 5%-ით ისედაც უნდა გაიზარდოს ეკონომიკა საქართველოში თავისი ბუნებრივი ზრდით ხომ?! დანარჩენი, ეს არის ის მასშტაბი, რაზეც ვისაუბრეთ. ალბათ დიდი უკანონო ფული ტრიალებს, რომლის ნაწილიც ლეგალიზდება და იქიდან კიდევ რას ავლენენ და რატომ, არავინ იცის ",- ამბობს აკაკი ცომაია.
