ეროვნულმა ბანკმა ლარში რეალურ რეჟიმში ანგარიშსწორების RTGS სისტემა განაახლა

საქართველოს ეროვნულმა ბანკმა ლარში, რეალურ რეჟიმში ანგარიშსწორებისა და კლირინგის (RTGS) სისტემის განახლება დაასრულა - ამის შესახებ ეროვნული ბანკის მიერ გამოქვეყნებულ ინფორმაციაში არის აღნიშნული.

სებ-ის თანახმად, ეს 2009 წლის შემდეგ ამ სისტემის განახლების პირველი შემთხვევაა და ის საფუძველს ქმნის, მასზე დაშენდეს ისეთი პროექტები, როგორიცაა მყისიერი გადახდების სისტემა (IPS), რაც ბანკიდან ბანკში 24/7-ზე მყისიერ გადარიცხვებს გახდის შესაძლებელს, ასევე დამატებით ციფრულ მომსახურებას გახდის შესაძლებელს. ამ მიმართულებით სებ-ი ახალი სისტემის ამოქმედებას წლის ბოლოს გეგმავს.

"RTGS-ის განახლებული სისტემის დანერგვა მიზნად ისახავს ფინანსური სექტორისა და მომხმარებლებისთვის - ფიზიკური და იურიდიული პირებისთვის - უფრო სწრაფი, უსაფრთხო და საიმედო მომსახურების უზრუნველყოფას, ასევე საერთაშორისო სტანდარტებთან კიდევ უფრო მეტად დაახლოებას. გარდა ამისა, ახალი ინფრასტრუქტურა ქმნის კარგ საფუძველს მომავალი ინოვაციური სერვისების, მათ შორის, მყისიერი გადახდების სისტემისა(IPS) და დამატებითი ციფრული მომსახურებების განვითარებისთვის.

ეს პროექტი ქვეყნის ფინანსური სექტორის მოდერნიზაციის ერთ-ერთი უმნიშვნელოვანესი ეტაპია და კიდევ უფრო აძლიერებს საქართველოს, როგორც თანამედროვე და მდგრადი საგადახდო ეკოსისტემის მქონე ქვეყნის პოზიციას მსოფლიოში მზარდი დიჯიტალიზაციის პროცესის კვალდაკვალ.

განახლებული საგადახდო სისტემა სრულად ეფუძნება ISO 20022-ის საერთაშორისო სტანდარტს და უზრუნველყოფს უფრო თანამედროვე, მოქნილ და ეფექტიან საგადახდო გარემოს.

პროექტი განხორციელდა მსოფლიო ბანკის მხარდაჭერით, რამაც მნიშვნელოვნად შეუწყო ხელი ქვეყნის საგადახდო ინფრასტრუქტურის საერთაშორისო სტანდარტებთან დაახლოებას და მისი მოდერნიზაციის პროცესის ეფექტიანად განხორციელებას.

ბოლოდროინდელი საკანონმდებლო ცვლილებების შედეგად, ეროვნული ბანკის საგადახდო სისტემის ინფრასტრუქტურაში გაფართოვდა მონაწილეთა წვდომა, რაც განახლებული სისტემის ფარგლებში ტექნიკურადაც სრულიად მხარდაჭერილი გახდა. კერძოდ, არასაბანკო საგადახდო მომსახურების პროვაიდერებს მიეცათ შესაძლებლობა შესაბამისი მოთხოვნების დაკმაყოფილების შემდგომ გახდნენ სისტემის მონაწილეები, რაც ხელს შეუწყობს კონკურენციის ზრდას და მომხმარებლისთვის უკეთესი მომსახურების შეთავაზებას.

საქართველოს ეროვნული ბანკი მადლობას უხდის ყველა ჩართულ მხარეს - კომერციულ ბანკებს, მიკრობანკებს, ფინანსთა სამინისტროს სახელმწიფო ხაზინას, აქტიური თანამშრომლობისა და სისტემის წარმატებული დანერგვის პროცესში შეტანილი მნიშვნელოვანი წვლილისთვის. ასევე, სისტემის მწარმოებელ კომპანია „მონტრანს“ პროექტის განხორციელების მთელი პერიოდის განმავლობაში გაწეული მხარდაჭერისა და მრავალწლიანი თანამშრომლობისთვის,"- ნათქვამია ეროვნული ბანკის მიერ გამოქვეყნებულ ინფორმაციაში.

სებ-ის სტატისტიკის თანახმად, RTGS სისტემა 2025 წელს 515.7 მილიარდი ლარის 52.8 მილიონ საბანკო ოპერაციას მოემსახურა.