ერთიანი ეროვნული გამოცდები დაიწყო - მინისტრი აბიტურიენტებს მიმართავს

ერთიანი ეროვნული გამოცდები დაიწყო. დღეს აბიტურიენტები გამოცდას ქართულ ენასა და ლიტერატურაში აბარებენ. განათლების სამინისტრო მინისტრის გივი მიქანაძის აბიტურიენტებისადმი მიმართვას ავრცელებს.

„ძვირფასო აბიტურიენტებო, წარმატებებს გისურვებთ ერთიან ეროვნულ გამოცდებზე! დარწმუნებული ვარ, თქვენი შრომა, მონდომება და მიზანდასახულობა ღირსეულ შედეგს გამოიღებს. თითოეული გამოცდა ახალი შესაძლებლობებისა და მომავალი წარმატებებისკენ გადადგმული მნიშვნელოვანი ნაბიჯია.

ჩვენ ყველაფერს გავაკეთებთ, რომ თქვენთვის უზრუნველყოფილი იყოს ჯანსაღი და კომფორტული აკადემიური გარემო, სადაც საკუთარი შესაძლებლობების მაქსიმუმის გამოვლენას შეძლებთ.

მჯერა, რომ თქვენი მონდომებითა და შემართებით მიაღწევთ დასახულ მიზნებს და თქვენი ცოდნით, პროფესიონალიზმითა და მიღწევებით ასახელებთ ჩვენს სამშობლოს”, - ნათქვამია მინისტრის მიმართვაში.

ცნობისთვის, წელს ერთიან ეროვნულ გამოცდებზე 43 000-ზე მეტი აბიტურიენტი დარეგისტრირდა, რაც წინა წლის მაჩვენებელს, დაახლოებით 4 000-ით აღემატება. ამასთან, წელს, საერთო სამაგისტრო გამოცდაზე 10 000-ზე მეტი კანდიდატია დარეგისტრირებულა, ხოლო მასწავლებლისა და მასწავლებლობის მსურველთა გამოცდებზე - 29 000-ზე მეტი მონაწილე.

გამოცდების სრული განრიგი