EU-ს ასოცირებული წევრები შესაძლოა ავსტრალია და ახალი ზელანდიაც გახდნენ - რობერტა მეცოლა

ევროპარლამენტის პრეზიდენტმა რობერტა მეცოლამ Euronews-ს განუცხადა, რომ კანადის კვალდაკვალ, ევროკავშირის "ასოცირებული წევრები", შესაძლოა, ავსტრალია და ახალი ზელანდიაც გახდნენ, რადგან ბლოკში მსგავსი ღირებულებების მქონე სახელმწიფოებთან კავშირების გაღრმავებას ცდილობენ.

ევროკავშირს ორივე ქვეყანასთან სავაჭრო შეთანხმებები უკვე აქვს.

გადაცემა Europe Today-სთან ექსკლუზიურ ინტერვიუში მეცოლამ შემოთავაზებულ სტატუსს სრულ წევრობასა და კანდიდატის სტატუსს შორის "მესამე გზა" უწოდა.

"არსებობენ ქვეყნები, რომლებთანაც ურთიერთობების გაღრმავება გვსურს. ეჭვი არ მეპარება, რომ ეს სხვა ქვეყნებსაც მოიცავს და ჩვენს კარზე სხვებიც დააკაკუნებენ... გაურკვევლობის ასეთ პერიოდში მეგობრების ყოლას გადამწყვეტი მნიშვნელობა აქვს", - აღნიშნა მეცოლამ.

კითხვაზე, თუ ტექნიკურად რას ითვალისწინებს ასოცირებული წევრობა, მეცოლამ აღიარა, რომ მოლაპარაკებები ჯერ საწყის ეტაპზეა, თუმცა ყურადღება გაამახვილა უფრო ღრმა სავაჭრო ურთიერთობებზე, კრიტიკულ ნედლეულზე წვდომასა და საერთო რეგულაციებზე ისეთ საკითხებში, რომლებიც "თანამოაზრე" ქვეყნებისთვის განსაკუთრებით მნიშვნელოვანია, მათ შორის სოციალურ მედიასა და არასრულწლოვანთა დაცვაზე.

ოთხშაბათს ევროკომისიის პრეზიდენტმა ურსულა ფონ დერ ლაიენმა ყოველწლიურ მიმართვაში კანადას "ასოცირებული წევრობა" შესთავაზა. კანადის პრემიერ-მინისტრი კარნი ბლოკთან დაახლოების გზებს აშშ-თან - კანადის უმსხვილეს სავაჭრო პარტნიორთან - მიმდინარე სავაჭრო ომისა და მაღალი სატარიფო შეზღუდვების ფონზე ეძებს.

ინიციატივის გაჟღერების შემდეგ დონალდ ტრამპმა ჟურნალისტებს განუცხადა, რომ იგი განიხილავს ევროკავშირის წინააღმდეგ ახალი ტარიფების დაწესებას, თუ ასოცირებული წევრობის პროცესი "მტრულ" ხასიათს მიიღებს.

მეცოლამ ეს მუქარები ნაკლებად მნიშვნელოვნად მიიჩნია და განაცხადა, რომ ევროკავშირი ამ ორ ქვეყანასთან ურთიერთობას ერთმანეთისგან დამოუკიდებლად განიხილავს. მისი თქმით, ევროკავშირი ვინმეს წინააღმდეგ არ მოქმედებს და წესებზე დაფუძნებული საერთაშორისო თანამშრომლობის მომხრეა. მან ასევე ყურადღება გაამახვილა სავაჭრო შეთანხმებაზე, რომელიც გასულ ზაფხულს შეთანხმდა და მიმდინარე წელს იქნა რატიფიცირებული.

"ჩვენი პარტნიორობის შემოთავაზებული გაძლიერება ვინმეს წინააღმდეგ კი არ არის მიმართული, არამედ ჩვენს საერთო სიძლიერეს ემსახურება", - განაცხადა ევროკომისიის წარმომადგენელმა.