EU-ს გაფართოების ფორუმზე საქართველოს ხელისუფლება არ მიიწვიეს - Euroscope
ევროკავშირის გაფართოების ფორუმზე საქართველოს ხელისუფლება არ მიუწვევიათ - ამის შესახებ ინფორმაციას წყაროზე დაყრდნობით Euroscope-ი ავრცელებს.
მიმდინარე წელს ევროკავშირის გაფართოების ფორუმი 2026 წლის 15 და 16 ნოემბერს, სლოგანით "უფრო ფართო ევროპა - უფრო ძლიერი ევროპა" გაიმართება.
ღონისძიება იქნება "საკვანძო შეხვედრა როგორც ევროკავშირის, ისე პარტნიორი ქვეყნების წამყვანი პოლიტიკოსებისა და საზოგადოებრივი ლიდერებისთვის, რათა განიხილონ კავშირისა და მისი წევრობის სამომავლო ტრაექტორია", - ნათქვამია ევროკომისიის გაფართოებისა და აღმოსავლეთ სამეზობლოს გენერალური დირექტორატის (DG ENEST) პრესრელიზში.
2026 წლის ფორუმის მიზანია ევროკავშირის გაფართოების პერსპექტივების განხილვა მიმდინარე გეოპოლიტიკური გამოწვევების კონტექსტში, ასევე ყველა ჩართული მხარისთვის მოქმედების ახალი იმპულსის მიცემა, რათა კურსი შენარჩუნდეს და პროცესი წინ წავიდეს.
ღონისძიების მასპინძელია ევროკომისარი გაფართოების საკითხებში მარტა კოსი. ფორუმი განკუთვნილია საკვანძო აქტორებისთვის, ექსპერტებისთვის, საზოგადოებრივი აზრის ლიდერებისა და ყველასთვის, ვინც ევროკავშირის გაფართოების შესახებ დისკუსიების წინსვლაში აქტიურად არის ჩართული.
ფორუმის ამოცანაა პროცესის წინსვლისთვის ძირითადი მხარეების ჩართულობისა და კოორდინაციის უზრუნველყოფა, გაფართოების კონკრეტული სცენარების, მათი სარგებლის, გამოწვევებისა და პოტენციური რისკების გაანალიზება, ასევე გაფართოებისა და შესაბამისი ქვეყნების მიმართ პოზიტიური აღქმის გაძლიერებასა და გავრცელებაში ხელშეწყობა.
დადასტურებულ სპიკერებს შორის არიან ევროკომისიის პრეზიდენტი ურსულა ფონ დერ ლაიენი, ევროპული საბჭოს პრეზიდენტი ანტონიუ კოშტა, მოლდოვის რესპუბლიკის პრეზიდენტი მაია სანდუ და ფინეთის პრეზიდენტი ალექსანდერ სტუბი.
BM.GE
წყარო: bm.ge