EU-ს წარმომადგენლობა საქართველოში მათ მიერ დაფინანსებული პროგრამების კურსდამთავრებულთა ქსელს აფართოებს
ევროკავშირის წარმომადგენლობა საქართველოში ევროკავშირის მიერ დაფინანსებული სასწავლო და პროფესიული განვითარების პროგრამების კურსდამთავრებულთა ქსელის გაფართოებას იწყებს.
როგორც ევროკავშირის საელჩო საქართველოში აცხადებს, ქსელი აერთიანებს იმ პირებს, რომლებმაც ევროკავშირის წევრ ქვეყნებში ან ევროკავშირის ინსტიტუტების მიერ დაფინანსებულ საგანმანათლებლო და პროფესიული განვითარების პროგრამებში მიიღეს მონაწილეობა.
"თუ თქვენ მონაწილეობდით ევროკავშირის წევრ ქვეყნებში, ევროკავშირის ინსტიტუტების მიერ დაფინანსებულ საგანმანათლებლო ან პროფესიული განვითარების პროგრამებში, შემოუერთდით ქსელს", - ნათქვამია ინფორმაციაში.
ევროკავშირის კურსდამთავრებულთა ქსელი სხვადასხვა პროფესიული გამოცდილების მქონე ადამიანებს აერთიანებს და ქმნის პლატფორმას პროფესიული გამოცდილების გაზიარებისა და საქმიანი კავშირების დამყარებისთვის.
ევროკავშირის წარმომადგენლობის ინფორმაციით, ქსელის მთავარი მიზანი ევროკავშირისა და საქართველოს ურთიერთობების საფუძველში არსებული ადამიანური კავშირების გაძლიერებაა.
BM.GE
წყარო: bm.ge