€300 000 ინვესტიცია და გაფართოების გეგმები – ფრანგული American Vintage საქართველოშია
ფრანგული ტანსაცმლის ბრენდი American Vintage საქართველოს ბაზარზე ოფიციალურად გამოჩნდა. ბრენდი ქვეყანაში ფრენჩაიზის მოდელით ოპერირებს, მისი ოფიციალური წარმომადგენელი კი კომპანია „ჯიტექს ჰოლდინგია“ (სავაჭრო სახელით THE REFERENCE), რომელიც 2025 წელს დაფუძნდა.
BM.GE-სთან კომპანიის მმართველი პარტნიორი გიორგი მინდიაშვილი ამბობს, რომ American Vintage-ის საქართველოში შემოსვლას წინ რამდენიმეთვიანი მოლაპარაკებები უძღოდა.
"American Vintage-თან მოლაპარაკებები 2024 წელს დავიწყეთ. ზოგადად, ამ მასშტაბის ბრენდებთან თანამშრომლობა საკმაოდ კომპლექსური პროცესია, რადგან ისინი დეტალურად აფასებენ პოტენციურ პარტნიორებს, ქვეყნის ბაზარს, საინვესტიციო გარემოს და სხვა ტექნიკურ მხარეებს. თუმცა, ჩვენს შემთხვევაში, პროცესი საკმაოდ დინამიკურად და პოზიტიურად წარიმართა და შეთანხმებას რამდენიმე თვეში მივაღწიეთ", - აცხადებს გიორგი მინდიაშვილი.
მისი თქმით, პროექტში ჯამურად 300 000 ევრომდე ინვესტიცია განხორციელდა, რომელიც მაღაზიის მოწყობას, საერთაშორისო სტანდარტების შესაბამის დიზაინს, ინვენტარსა და ოპერაციული პროცესების გამართვას მოხმარდა.
მაღაზია ჭავჭავაძის გამზირზე გაიხსნა. როგორც მინდიაშვილი განმარტავს, ლოკაცია ბრენდთან ერთად შეირჩა, ხოლო ინტერიერის ყველა მნიშვნელოვანი დეტალი American Vintage-ის საერთაშორისო სტანდარტების შესაბამისად მოეწყო.
"მაღაზიის ინტერიერის ყველა დეტალი, მათ შორის მასალების უმეტესი ნაწილი, უშუალოდ საფრანგეთიდან, ესპანეთიდან, იტალიიდან და სკანდინავიიდან არის ჩამოტანილი. ბრენდი უდიდეს მნიშვნელობას ანიჭებს სავაჭრო სივრცის ესთეტიკასა და ხარისხს, ამიტომ მათი წარმომადგენლები მთელი პროცესის განმავლობაში ჩართულნი იყვნენ დიზაინისა და მოწყობის სამუშაოებში", – ამბობს ის.
კომპანიის ინფორმაციით, American Vintage-ის კოლექციების 100% ევროპაში იწარმოება, ძირითადად სამხრეთ საფრანგეთში, მარსელში, ხოლო ქსოვილები უმეტესად პორტუგალიური, ფრანგული და ესპანური წარმოშობისაა. ბრენდი მომხმარებელს ქალის, მამაკაცისა და ბავშვის ტანსაცმელს სთავაზობს, ხოლო ასორტიმენტი ყოველ სამ კვირაში ერთხელ ახლდება.