ევროკავშირმა გრენლანდიისთვის €200-მილიონიანი საინვესტიციო პაკეტი წარადგინა

ევროკომისიის პრეზიდენტმა, ურსულა ფონ დერ ლაიენმა გრენლანდიის დედაქალაქ ნუუკში ოფიციალური ვიზიტისას €200 მილიონის ($232 მლნ) მოცულობის საინვესტიციო პაკეტი წარადგინა.

ევროპული მხარე მიზნად დანიის თვითმმართველ ტერიტორიასთან სტრატეგიული კავშირების გაღრმავებასა და პარტნიორობის განმტკიცებას ისახავს. ოფიციალურ ცერემონიაზე ევროკომისიის ხელმძღვანელმა კუნძულს სტრატეგიული მოკავშირე და ევროპული ოჯახის სანდო წევრი უწოდა. ამასთან, ფონ დერ ლაიენმა განაცხადა, რომ გრენლანდიის მომავალი მხოლოდ ადგილობრივი მოსახლეობისა და დანიის მიერ განისაზღვრება. ლიდერმა მკაფიოდ თქვა, რომ ევროკავშირისთვის საერთაშორისო სამართლის ფუნდამენტურ პრინციპებად ტერიტორიული მთლიანობა და საზღვრების ხელშეუხებლობა მიიჩნევა და რომ მათ ბრიუსელი ბოლომდე სცემს პატივს.

რაც შეეხება საინვესტიციო პაკეტის დეტალებს, ის ციფრულ კავშირგაბმულობას, სუფთა ენერგეტიკასა და კრიტიკული ნედლეულის მოპოვებას მოიცავს. პროგრამის ფარგლებში მთავარი ყურადღება დაშორებულ რეგიონებში სატელიტური ინტერნეტის გაუმჯობესებასა და ახალი ჰიდროელექტროსადგურების მშენებლობას ეთმობა. ამას გარდა, ევროპული დაფინანსება მალმბიერგის მოლიბდენის მომპოვებელ პროექტზეც გავრცელდება. გათვლებით, ეს ინიციატივა გრენლანდიას ყოველწლიურად €90 მილიონის ($104 მლნ) ოდენობის დამატებით შემოსავალს მოუტანს.