ევროკავშირმა რუსულ VK-ს სანქციები დაუწესა

ევროკავშირმა რუსული ტექნოლოგიური ჰოლდინგის, VK-სა და მის შვილობილი კომპანიის, Communication Platform LLC-ის წინააღმდეგ სანქციები დააწესა.

ბრიუსელის განმარტებით, აღნიშნული გადაწყვეტილება კრემლის მიერ მხარდაჭერილი მესენჯერის, MAX-ის შექმნაში კომპანიის როლს უკავშირდება.

ევროპული სტრუქტურების განცხადებით, დასახელებული აპლიკაცია მასობრივი თვალთვალისა და ცენზურის მიზნით შეიქმნა, მისი განვითარების პროცესს კი რუსეთის ფედერალური უსაფრთხოების სამსახური მეთვალყურეობდა. ექსპერტების დასკვნით, ციფრულ პლატფორმას მომხმარებელთა კომუნიკაციის კონტროლის ფართო ფუნქციები აქვს.

არსებული ინფორმაციით, აპლიკაცია MAX-ის დანერგვასა და პოპულარიზაციას რუსეთში სხვა დამოუკიდებელი პლატფორმების, მათ შორის, Telegram-ისა და WhatsApp-ის ბლოკირება და შეზღუდვა ახლდა თან. ევროკავშირის ოფიციალურ განცხადებაში აღნიშნულია, რომ ჰოლდინგი VK სამოქალაქო საზოგადოებისა და დემოკრატიული ოპოზიციის რეპრესიებს ტექნიკურად უჭერს მხარს.

საყურადღებოა, რომ გასულ თვეში კომპანია Apple-მა App Store-ის ციფრული მაღაზიიდან VK-ს პლატფორმები და მესენჯერი MAX-ი სრულად წაშალა. ამერიკული კორპორაციის განმარტებით, ეს ნაბიჯი საერთაშორისო სანქციების მოთხოვნათა შესრულებას უკავშირდებოდა, მიუხედავად იმისა, რომ უშუალოდ ჰოლდინგი იმ პერიოდისთვის ოფიციალურ შავ სიაში არ ირიცხებოდა.

შეგახსენებთ, რომ აპლიკაცია MAX-ი რუსეთის ბაზარზე გაყიდულ ყველა მობილურ ტელეფონსა და პლანშეტზე სავალდებულო წესით დასაინსტალირებელი პროგრამების სიაში შედის და ის სამთავრობო თვალთვალის მექანიზმს წარმოადგენს.