ევროკავშირმა უნგრეთს სასამართლო უჩივლა - რა გახდა მიზეზი?

ევროპულმა კომისიამ უნგრეთის წინააღმდეგ ევროკავშირის მართლმსაჯულების სასამართლოში სარჩელი შეიტანა. არსებული ინფორმაციით, ბრიუსელი ბუდაპეშტისგან იმ რეგულაციის გაუქმებას ითხოვს, რომელიც ძირითადად უცხოურ სავაჭრო ქსელებში სურსათსა და პირველადი მოხმარების პროდუქციაზე ფასნამატის ლიმიტის დაწესებას ითვალისწინებს.

ევროკომისიის განცხადებით, უნგრეთი სავაჭრო კომპანიების მარჟებს არასწორად აფასებს. ბუდაპეშტის პოზიციით, შესყიდვისა და გასაყიდ ფასებს შორის სხვაობა კომპანიების სუფთა მოგებას უთანაბრდება. ოფიციალურ ბრიუსელში მიიჩნევენ, რომ ქვეყნის ხელისუფლება პერსონალის, უძრავი ქონებისა და გადასახადების დამატებით ხარჯებს მხედველობაში საერთოდ არ იღებს.

ცნობისთვის, ინფლაციასთან დასაპირისპირებლად, 30 დასახელების ძირითად სასურსათო პროდუქტზე ფასნამატის 10%-იანი ლიმიტი უნგრეთმა ჯერ კიდევ ვიქტორ ორბანის პრემიერმინისტრობისას, 2025 წლის მარტში დააწესა. მოგვიანებით, ქვეყნის მთავრობამ რეგულაციის მოქმედების ვადები რამდენჯერმე გაახანგრძლივა. მიმდინარე წლის მაისში კი ხელისუფლებამ ეს შეზღუდვები მუდმივ რეჟიმში აამოქმედა.