ევროკომისიამ ჩეხეთის პრემიერ-მინისტრთან დაკავშირებული კომპანიების დაფინანსება შეაჩერა

ევროკომისიამ ჩეხეთის პრემიერ-მინისტრ ანდრეი ბაბიშთან დაკავშირებული კომპანიებისთვის, ევროკავშირის სუბსიდიების გამოყოფა ინტერესთა კონფლიქტის სავარაუდო არსებობის გამო შეაჩერა. არსებული ინფორმაციით, ბრიუსელი ფინანსური სახსრების გადარიცხვას მანამ არ განაახლებს, სანამ საკითხები სრულად არ გაირკვევა.

გამოცემა POLITICO-ს მიერ მოპოვებული ოფიციალური წერილის თანახმად, ეს შეზღუდვა კონგლომერატ Agrofert-ს, ასევე SynBiol-სა და Hartenberg Holding-ს შეეხება. ევროკომისიის რეგიონული პოლიტიკის დეპარტამენტის მაღალჩინოსანმა ჰუგო სობრალმა ჩეხეთის ხელისუფლებას შესაბამისი დოკუმენტი უკვე გადაუგზავნა.

ევროკავშირის აღმასრულებელმა ორგანომ ჩეხეთის ხელისუფლებას ერთი თვის ვადა მისცა, რათა პრემიერ-მინისტრის ქმედებების ევროპულ კანონმდებლობასთან შესაბამისობის დეტალური სამართლებრივი ანალიზი წარადგინოს. თავად ანდრეი ბაბიში კი ინტერესთა კონფლიქტის არსებობას კატეგორიულად უარყოფს. მთავრობის მეთაურის განცხადებით, მან ეს პრობლემა ჩეხური და ევროპული კანონმდებლობის მოთხოვნებზე ბევრად უფრო ეფექტურად გადაჭრა. ბაბიშის განცხადებით, ის Agrofert-ის მფლობელი აღარ არის.

ცნობისთვის, ანდრეი ბაბიშმა პრემიერ-მინისტრის პოსტი გასული წლის 9 დეკემბერს დაიკავა. მან ინტერესთა კონფლიქტის თავიდან ასაცილებლად კონგლომერატი სპეციალურ სატრასტო ფონდში გადაიტანა. თუმცა, ამისდა მიუხედავად, ოპოზიციური პარტიები და არასამთავრობო ორგანიზაციები ამტკიცებენ, რომ მთავრობის მეთაურს საკუთარ ბიზნესიმპერიასთან კავშირი სრულად არ გაუწყვეტია.