ფინანსთა სამინისტრო აქტიური გადამხდელის სტატუსის მინიჭების დამატებით პირობებს განსაზღვრავს
საქართველოს ფინანსთა მინისტრის №180 ბრძანებით, შეიცვალა „გადასახადების ადმინისტრირების შესახებ“ ბრძანება და განისაზღვრა აქტიური გადამხდელის სტატუსის მინიჭების დამატებითი პირობები.
BDO-ს საკანონმდებლო მიმოხილვის თანახმად, ახალი წესით, გადასახადის გადამხდელს აქტიური სტატუსი შეიძლება მიენიჭოს, თუ მის სახელზე რეგისტრირებულია მოქმედი POS-ტერმინალი, მობილური POS-ტერმინალი ან ელექტრონული კომერციის ტერმინალი, გახსნილი აქვს აქტიური საბანკო ანგარიში, გამოწერილი აქვს საგადასახადო დოკუმენტი, მინიჭებული აქვს მიკრო, მცირე ან ფიქსირებული გადასახადის გადამხდელის სტატუსი, ან რეგისტრირებულია დღგ-ის გადამხდელად და აღნიშნული რეგისტრაცია ძალაშია.
დოკუმენტში ასევე აღნიშნულია, რომ აქტიური გადამხდელის სტატუსის მინიჭებისთვის მოქმედებს სხვა კრიტერიუმებიც, მათ შორის ახლად რეგისტრაცია, კანონმდებლობით გათვალისწინებული დეკლარაციების წარდგენა, გადასახადების გადახდა და საკონტროლო-სალარო აპარატზე ბრუნვის დაფიქსირება.
ფინანსთა სამინისტროს განმარტებით, საქმიანობის აქტივობის შეფასების მიზნით გადასახადის გადამხდელს შეიძლება მიენიჭოს ერთ-ერთი შემდეგი სტატუსი: აქტიური გადამხდელი, პასიური გადამხდელი, არამეწარმე ფიზიკური პირი ან ლიკვიდირებული/გარდაცვლილი გადამხდელი.