ფინანსთა სამინისტრომ ბარტერული ოპერაციების დღგ-ით დაბეგვრის მიდგომა შეცვალა - დავით პაპიაშვილის განმარტება

სამშენებლო სექტორისთვის საგადასახადო რეგულაციები მკაცრდება. ფინანსთა სამინისტრომ ბარტერული ოპერაციების დღგ-ით დაბეგვრის მიდგომა შეცვალა, რაც დეველოპერებისთვის საგადასახადო ხარჯების ზრდას ნიშნავს.

აქამდე მოქმედი პრაქტიკით, როდესაც სამშენებლო კომპანია მიწის ნაკვეთის სანაცვლოდ მესაკუთრეს ბინებს გადასცემდა, დღგ-ით დასაბეგრი ბაზა ძირითადად მიღებული მიწის ნაკვეთის საბაზრო ფასით განისაზღვრებოდა. ახალი მიდგომით კი, დაბეგვრა მოხდება იმ აქტივის საბაზრო ფასიდან, რომელიც უფრო მაღალი იქნება - მიღებული მიწის თუ გადასაცემი ბინების.

აუდიტორული კომპანია Kreston Georgia-ს მმართველი პარტნიორი დავით პაპიაშვილი BMG-სთან განმარტავს, რომ ეს ცვლილება პრაქტიკაში არსებული ხარვეზის გამოსწორებას ემსახურება, თუმცა ბიზნესისთვის დამატებით ხარჯებთან არის დაკავშირებული.

„ფინანსთა სამინისტრომ შეცვალა მიდგომა და ფაქტობრივად ამბობენ, რომ რომელიც უფრო დიდი თანხა იქნება საბაზრო ფასის გამოხატულებაში - სანაცვლოდ მიღებული მიწის ნაკვეთი თუ გადასაცემი ბინის საბაზრო ფასი - უდიდეს თანხას უნდა გამოაკლდეს სამშენებლო კომპანიების მიერ დამატებული თანხა. უმეტეს შემთხვევაში სამშენებლო კომპანიების მიერ გადასაცემი აქტივების ღირებულება უფრო მაღალია ხოლმე, რაც იმას ნიშნავს, რომ კომპანიებს უფრო დიდი თანხების დაბეგვრა მოუწევთ,“ - აცხადებს დავით პაპიაშვილი.

მისი თქმით, ეს ცვლილება კიდევ უფრო აძლიერებს საგადასახადო წნეხს იმ ფონზე, როდესაც რამდენიმე წლის წინ შემოღებული რეგულაციით, მიწის ნაკვეთის მიღება ავანსად ითვლება და კომპანიას დღგ-ის გადახდა მიწის მიღებისთანავე უწევს.

ამასთან, დავით პაპიაშვილი მიიჩნევს, რომ საგადასახადო მიდგომების ხშირი ცვლილება და საკითხების ფრაგმენტული გადაწყვეტა ბიზნესისთვის ბუნდოვან გარემოს ქმნის. მისი თქმით, ბევრი საკითხი, რომელიც კანონის დონეზე უნდა წყდებოდეს, მხოლოდ საჯარო გადაწყვეტილებებით რეგულირდება.