ფინეთის პარლამენტმა ბირთვული იარაღის სრული აკრძალვის გაუქმების კანონპროექტს მხარი დაუჭირა

ფინეთის პარლამენტმა ოთხშაბათს ბირთვული იარაღის სრული აკრძალვის გაუქმებას მისცა ხმა - მიზანი 2023 წელს ნატოში გაწევრიანების შემდეგ ალიანსის შეკავების პოლიტიკასთან შესაბამისობაში მოყვანაა.

კანონპროექტი ფინეთში ბირთვული იარაღის შემოტანას, ტრანსპორტირებას, მიწოდებას ან ფლობას იმ შემთხვევაში დაუშვებს, თუ ამას ქვეყნის სამხედრო თავდაცვა მოითხოვს.

მთავრობის წინადადებას მხარი 125-მა დეპუტატმა დაუჭირა, 61-მა წინააღმდეგ მისცა ხმა, ხოლო 13 დარბაზში არ იმყოფებოდა. ვინაიდან კანონპროექტი პარლამენტმა უკვე დაამტკიცა, ახლა მას მხოლოდ პრეზიდენტის ხელმოწერა სჭირდება.

ეს გადაწყვეტილება აუქმებს ქვეყნის "ბირთვული ენერგიის შესახებ" 1980-იანი წლების კანონში არსებულ ეროვნულ აკრძალვას ბირთვული ასაფეთქებელი მოწყობილობების იმპორტზე, წარმოებაზე, ფლობასა და აფეთქებაზე.

ის ასევე ცვლის სისხლის სამართლის კოდექსს და ბირთვული იარაღის აკრძალვასთან დაკავშირებულ გამონაკლისებს ამატებს.

"ამ წინადადებით ჩვენ ვაძლიერებთ ფინეთის თავდაცვას და ფინეთის დასაცავად ნატოს ბირთვული შეკავების სრულად გამოყენებას ვხდით შესაძლებელს," - დაწერა თავდაცვის მინისტრმა ანტი ჰაკანენმა პლატფორმა X-ზე სამშაბათს, კენჭისყრამდე ერთი დღით ადრე.

უკრაინაში რუსეთის სრულმასშტაბიანი შეჭრის საპასუხოდ, 2023 წლის აპრილში ფინეთმა უარი თქვა ათწლეულების განმავლობაში არსებულ სამხედრო მიუმხრობლობაზე და ნატოში გაწევრიანდა.

ბოლო თვეებში ამ წინადადებამ ფინეთში დებატები გამოიწვია. ოპოზიციურმა პარტიებმა გააკრიტიკეს ფინეთის გადახვევა ბირთვული იარაღის აკრძალვის დიდი ხნის წინ ჩამოყალიბებული პოზიციიდან.

პრემიერ-მინისტრმა პეტერი ორპომ ივნისის დასაწყისში განაცხადა, რომ ფინეთი დაინტერესებული იყო საფრანგეთის ლიდერობით წამოწყებული ბირთვული შეკავების სქემით, რომელიც კონტინენტზე უსაფრთხოების გაძლიერებას ისახავს მიზნად, თუმცა ამ საკითხზე გადაწყვეტილება ჯერ არ მიუღიათ.

მარტში საფრანგეთის პრეზიდენტმა ემანუელ მაკრონმა წარადგინა პროგრამა, რომლის მიხედვითაც საფრანგეთი (ევროკავშირის ერთადერთი ბირთვული იარაღის მქონე ქვეყანა) კონტინენტზე უსაფრთხოების გასაძლიერებლად თავის ატომურ არსენალს გამოიყენებს.