ფორმულა 1 აფრიკაში ბრუნდება და რბოლებს მომდევნო 10 წელი რუანდაში ჩაატარებს

ფორმულა 1-მა გამოაცხადა, რომ თითქმის 40-წლიანი პაუზის შემდეგ აფრიკაში დაბრუნდება. ამის შესახებ ცნობილი გახდა მას შემდეგ, რაც რუანდასთან შეთანხმება გაფორმდა, რომლის მიხედვითაც ქვეყანა რბოლას 2030-იანი წლების დასაწყისში უმასპინძლებს.

ახალი ტრასა რუანდის დედაქალაქ კიგალის გარეუბანში, ბუგესერაში აშენდება. რბოლას „აფრიკის გრან-პრი - Visit Rwanda-ს წარდგენით“ ეწოდება. მხარეებს შორის გაფორმებული შეთანხმება 10 წლით არის გათვლილი.

ჯერჯერობით უცნობია, რომელ წელს გაიმართება რბოლა პირველად. ფორმულა 1-ის განცხადებით, ეტაპი კალენდარს „2030-იანი წლების დასაწყისში“ დაემატება.

თუ რბოლა უკვე 2030 წელს ჩატარდება, ეს ნიშნავს, რომ ფორმულა 1 აფრიკაში ბოლოს ჩატარებული გრან-პრიდან 37 წლის შემდეგ დაბრუნდება. კონტინენტზე ბოლო რბოლა 1993 წელს სამხრეთ აფრიკის კაიალამის ტრასაზე გაიმართა. მას შემდეგ სპორტმა კალენდარი მნიშვნელოვნად გააფართოვა აზიასა და ჩრდილოეთ ამერიკაში, რის შედეგადაც აფრიკა ერთადერთი კონტინენტი დარჩა, რომელსაც ფორმულა 1-ის კალენდარში ეტაპი არ ჰქონდა.

ბოლო წლებში აფრიკაში რბოლის დაბრუნების საკითხი სულ უფრო აქტუალური გახდა. სამხრეთ აფრიკა კვლავ გამოხატავდა ინტერესს, რომ გრან-პრი კაიალამის ტრასაზე დაბრუნებულიყო, თუმცა ფორმულა 1-თან მოლაპარაკებების უფრო მოწინავე ეტაპზე რუანდის განვითარების საბჭო იმყოფებოდა, რომელიც პროექტის განხორციელებაზე მუშაობდა.