ფრანგული ავიამზიდი ჰორმუზის სრუტისკენ მიემართება - რატომ?

ფრანგულმა ავიამზიდმა, Charles de Gaulle-მა, სუეცის არხი გადაკვეთა და წითელ ზღვაში შევიდა. ხომალდი ჰორმუზის სრუტისკენ მიემართება, სადაც ის ნავიგაციის აღდგენის მასშტაბურ ოპერაციაში მიიღებს მონაწილეობას.

როგორც ირკვევა, პარიზი აპრილში დაწყებული ფრანგულ-ბრიტანული ინიციატივის დაჩქარებას ცდილობს. ცნობისთვის, იმ პროცესში, რომელიც მიზნად სტრატეგიულ მარშრუტზე მოძრაობის განახლებას ისახავს, 51 ქვეყანა მონაწილეობს.

აღსანიშნავია, რომ საფრანგეთს სრუტეში ნაოსნობის უსაფრთხოების უზრუნველყოფა სურს, თუმცა კონფლიქტში ჩართვას ერიდება. ემანუელ მაკრონის განმარტებით, დასახელებული მისია მხოლოდ თავდაცვით ხასიათს ატარებს. ამასთან, პარიზი ირანსა და აშშ-ს შორის მედიაციის წინადადებით გამოდის. ფრანგული მხარის ინიციატივა სრუტეში გემების გატარებას და სანაცვლოდ ბირთვულ საკითხებზე მოლაპარაკებების დაწყებას ითვალისწინებს.

ცნობისთვის, სრუტის ბლოკადამ ევროპაში ენერგეტიკული და კომერციული კრიზისი გამოიწვია. ამ ფაქტს დაემატა ისიც, რომ სამშაბათს საღამოს ჰორმუზის სრუტეში ფრანგული კომპანია CMA-CGM-ის კუთვნილი გემი დაზიანდა.

შეგახსენებთ, რომ ჰორმუზის სრუტეზე მსოფლიო ნედლი ნავთობის დაახლოებით 20% მოდის. რეგიონში საზღვაო მიმოსვლა კი მას შემდეგ შეიზღუდა, რაც 2026 წლის 28 თებერვალს აშშ-მა და ისრაელმა ირანის წინააღმდეგ საომარი მოქმედებები დაიწყეს.