ფულის გათეთრებისთვის სების მიერ დაწესებული ჯარიმები გაათმაგდა და 9.6 მლნ ლარი შეადგინა

2025 წელს საქართველოს ეროვნულმა ბანკმა საფინანსო სექტორს ფულის გათეთრების კანონმდებლობის დარღვევისთვის 9.6 მილიონი ლარის ჯარიმები დაუწესა - ამის შესახებ სების მიერ პარლამენტში წარდგენილი 2025 წლის ანგარიშიდან ხდება ცნობილი. დოკუმენტის თანახმად, ფულადი ჯარიმების მოცულობა 2024 წელთან შედარებით (961,000 ლარი) გაათმაგებულია. კერძოდ კი ჯარიმების უდიდესი ნაწილი მოდის ვალუტის გადამცვლელ პუნქტებზე, თუკი 2024 წელს მათ ფულის გათეთრების კანონმდებლობის დარღვევისთვის - რაც ძირითადად მსხვილ ტრანზაქციებში მომხმარებელთა იდენტიფიცირების წესის დარღვევას უკავშირდება, დაწერილი ჯარიმები მხოლოდ 45,000 ლარი იყო, 2025 წელს 7.87 მილიონ ლარამდე გაიზარდა.

ასევე გაიზარდა კომერციული ბანკებისთვის დაწესებული ჯარიმებიც 181,000 ლარიდან 330,000 ლარამდე. მიკროსაფინანსო ორგანიზაციების შემთხვევაში კი ჯარიმების მოცულობა 314 ათასი ლარიდან 287 ათას ლარამდე შემცირდა. ვირტუალური აქტივების პროვაიდერებს კი სებმა 470 ათასი ლარის ჯარიმები დაუწესა (2024 წელს სები ამ ორგანიზაციებს არ არეგულირებდა).

ფულის გათეთრების კანონმდებლობის დარღვევისთვის ეროვნული ბანკის მიერ 2025 წელს დაწერილი ჯარიმები:

• ვალუტის გადამცვლელი პუნქტი 7 867 150 ლარი; • სესხის გამცემი სუბიექტი 497 000 ლარი; • ვირტუალური აქტივის მომსახურების პროვაიდერი 470 000 ლარი; • კომერციული ბანკი 330 000 ლარი; • მიკროსაფინანსო ორგანიზაცია 287 200 ლარი; • საბროკერო კომპანია 71 600 ლარი; • საგადახდო მომსახურების პროვაიდერი 60 000 ლარი; • საინვესტიციო ფონდი 4 000 ლარი; • აქტივების მმართველი კომპანია 2 000 ლარი.