გადასარეკი გზების და საძოვრები გამოწვევად რჩება - რა განიხილა სექტორმა მინისტრთან შეხვედრაზე?
გარემოს დაცვისა და სოფლის მეურნეობის მინისტრი დავით სონღულაშვილი წვრილფეხა მესაქონლე ფერმერებს და ექსპორტიორებს შეხვდა.
სამინისტროს პრესრელიზის თანახმად, შეხვედრაზე, მხარეებმა დარგში არსებული გამოწვევები და განვითარების პერსპექტივები განიხილეს. საუბარი შეეხო გადასარეკი გზებისა და საძოვრების ხელმისაწვდომობის, ჯიშთა სელექციის მნიშვნელობის საკითხებს, ასევე, დარგის განვითარების მხარდამჭერი პროგრამების ისეთი ფორმით მოდიფიცირების აუცილებლობას, რომ შეესაბამებოდეს სექტორის რეალურ გამოწვევებს. შეხვედრას მინისტრის მოადგილე ლაშა ავალიანი, ასევე სამინისტროს შესაბამისი უწყებების ხელმძღვანელი პირები ესწრებოდნენ.
„წვრილფეხა მესაქონლეობის სექტორის განვითარება სახელმწიფოს ერთ-ერთ მნიშვნელოვან პრიორიტეტს წარმოადგენს. სექტორის საჭიროებებზე დროული რეაგირების და ეფექტიანი მართვის მიზნით, მივიღეთ გადაწყვეტილება დარგობრივი საბჭოს შექმნის შესახებ. მნიშვნელოვანია, დარგის წარმომადგენლებთან მუდმივი კომუნიკაციის პირობებში განისაზღვროს მექანიზმები, რომელიც სექტორის განვითარებას შეუწყობს ხელს“, - აღნიშნა დავით სონღულაშვილმა.
საბჭოს შეხვედრები ყოველთვიურად მინისტრის მოადგილის კურატორობით გაიმართება, კვარტალში ერთხელ კი, შეხვედრას მინისტრი უხელმძღვანელებს.
„აგროქიზიყის“ დამფუძნებელი ბექა გონაშვილი, რომელიც შეხვედრაში მონაწილეობდა, BM.GE-სთან ამბობს, რომ გამოწვევების გადაჭრა შესაბამისი უწყებების პრეროგატივაა, თავის მხრივ კი მზად არიან ჩართულობისთვის. მისივე ინფორმაციით, გამოსავალზე ან ვადებზე სამინისტროსგან კონკრეტული პასუხი არ მიუღიათ.
"გადასარეკი ტრასები პრობლემაა, საძოვრებზე ხელმისაწვდომობა არის პრობლემა. [სამინისტროსგან] კონკრეტული პასუხი არ გვაქვს. გვაქვს ის, რომ ვიმუშავებთ ერთად, მოვაგვარებთ და დანარჩენი ვნახოთ.
ამ სეზონზე გადარეკვისას გაგვიხსნეს გზა და შემოდგომაზე უკან გადმორეკვის დროს, თუ არ მოგვარდა, ისევ პრობლემები გვექნება და იმედი მაქვს, რომ მოგვარდება",- ამბობს ბექა გონაშვილი.