გამოვრიცხეთ ე.წ. "პირამიდის პრინციპით" ტენდერებში შემოსვლა - ინფრასტრუქტურის მინისტრი

ინფრასტრუქტურის მინისტრის, რევაზ სოხაძის განცხადებით, მთავრობას ინფრასტრუქტურული პროექტების მართვაში რიგი სიახლეები შემოაქვს, რაც უკავშირდება როგორც სატენდერო პროცესების ეფექტიანობის გაუმჯობესებას, ასევე არაკეთილსინდისიერი კომპანიების ტენდერებიდან გამორიცხვას და პროექტების დროულ ვადებში შესრულების ხელშეწყობას.

ინფრასტრუქტურის მინისტრის თქმით, გამოირიცხება ეგრეთ წოდებული "პირამიდის პრინციპით" ტენდერის შესრულება. საუბარია სქემაზე, რომლის დროსაც კომპანია, რომელიც ტენდერში მოგების მიზნით განგებ აფიქსირებდა არარეალურად დაბალ ფასს, რაც ტენდერის სავარაუდო ღირებულებაზე 20%-ზე მეტად ნაკლები იყო, სახელმწიფოსგან იღებდა საავანსო თანხებს და არაერთ შემთხვევაში პროექტს ვერ ახორციელებდა. მინისტრის თქმით, თუკი კომპანია წარადგენს ტენდერის სავარაუდო ღირებულებაზე 20%-ზე დაბალ ფასს მან შეიძლება ტენდერში გაიმარჯვოს, თუმცა ასეთ მიმწოდებელს სახელმწიფო პროექტის ავანსს არ გადაუხდის, ამასთან მისთვის საბანკო გარანტიაც ორჯერ გაიზრდება.

საქართველოს მთავრობის გადაწყვეტილებით, ცვლილებები იგეგმება №55 დადგენილებით დამტკიცებულ ტექნიკურ რეგლამენტსა და „სახელმწიფო შესყიდვების შესახებ“ საქართველოს კანონში. სწორედ აღნიშნულ ცვლილებებზე რევაზ სოხაძე და ირაკლი კობახიძე დღეს სამშენებლო სექტორის წარმომადგენლებს შეხვდნენ.

"გარკვეული პირობები შემოდის. თუ კომპანია 20%-ზე მეტ ფასდაკლებას განახორციელებს, ის აღარ მიიღებს ავანსს, მისი ხელშეკრულების უზრუნველყოფის გარანტია ორჯერ გაიზრდება. შესაბამისად, გამოვრიცხოთ ეგრეთ წოდებული „პირამიდის პრინციპით“ ტენდერებში შემოსვლა", - განაცხადა მინისტრმა.

რევაზ სოხაძის განცხადებით, მკაცრდება რეგულირება შავ სიათან დაკავშირებით და ამ სიაში მყოფი კომპანიების დამფუძნებლებს ახალი კომპანიის დაფუძნებით ხელახლა ტენდერებში შესვლა შეეზღუდებათ.

"რაც შეეხება „შავ სიასთან“ დაკავშირებით, აქაც გადაწყვეტილებები მიღებულია, რომ არ მოხდეს მხოლოდ სახელის ცვლილებით ერთი და იგივე დამფუძნებლის მიერ სხვადასხვა კომპანიის ჩამოყალიბება. ამ მიმართულებით მიდგომები მკაცრდება", - განაცხადა მინისტრმა.

მთავრობის ადმინისტრაციის ინფორმაციით, ინფრასტრუქტურულ პროექტებში დაგეგმილი ცვლილებების ფარგლებში იზრდება ზედნადები და გაუთვალისწინებელი ხარჯების ლიმიტი, განახლდება სამშენებლო მასალებისა და მანქანა-მექანიზმების ფასები, ასევე დაინერგება ინდექსაციის მექანიზმი, რომელიც პროექტების მიმდინარეობისას ფასების ცვლილების შემთხვევაში ხელშეკრულების ღირებულების ნაწილობრივ კორექტირებას უზრუნველყოფს.

რეფორმა ასევე ითვალისწინებს მცირე და საშუალო ბიზნესის მხარდაჭერას — შესაძლებელი გახდება სახელმწიფო ტენდერებში პრეტენდენტისა და მისი ქვეკონტრაქტორის გამოცდილების გაერთიანება, რაც კომპანიებს მსხვილ პროექტებში უფრო აქტიური მონაწილეობის შესაძლებლობას მისცემს.

პარალელურად, მკაცრდება პასუხისმგებლობისა და კონტროლის მექანიზმები — იზღუდება არარეალისტურად დაბალი ფასებით ტენდერებში მონაწილეობა, ხოლო შავი სიის მექანიზმი ფართოვდება, რის შედეგადაც ფინანსურ ან კორუფციულ დანაშაულებთან დაკავშირებული პირების კომპანიები შესაძლოა სახელმწიფო ტენდერებიდან დისკვალიფიცირდნენ.