განათლების მინისტრმა საგანმანათლებლო პროგრამების აკრედიტაციისთვის განაცხადის ვადა ორი თვით გადაწია
განათლების მინისტრმა გივი მიქანაძემ საგანმანათლებლო პროგრამების აკრედიტაციისთვის განაცხადის შეტანის ვადა ორი თვით გადაწია. შესაბამისი ცვლილება მინისტრის 1 მაისის ბრძანებით „უმაღლესი საგანმანათლებლო დაწესებულებების საგანმანათლებლო პროგრამების აკრედიტაციის დებულებისა და საფასურის დამტკიცების შესახებ“ 2011 წლის 4 მაისის ბრძანებაში შევიდა.
უკვე არსებულ ბრძანებას დაემატა ახალი მუხლი, რომელშიც აღნიშნულია: “თუ საგანმანათლებლო პროგრამას აკრედიტაციის ვადა ეწურება 2026 წლის 31 დეკემბრის ჩათვლით, საგანმანათლებლო პროგრამის ხელახალი აკრედიტაციის მიზნით, ცენტრში სააკრედიტაციო განაცხადის წარდგენა, ნაცვლად ამ დებულების მე-20 მუხლის მე-16 პუნქტით გათვალისწინებული ვადისა (მიმდინარე წლის პირველი მაისის ჩათვლით) განხორციელდეს 2026 წლის პირველი ივლისის ჩათვლით.“
ამასთან ცვლილების თანახმად, თუ სააკრედიტაციო განაცხადი ცენტრს წარედგინა ვადების დაცვით და ცენტრის დირექტორმა გამოსცა ინდივიდუალური ადმინისტრაციულ-სამართლებრივი აქტი უმაღლესი საგანმანათლებლო დაწესებულების აკრედიტაციის მაძიებლად ცნობის თაობაზე, აკრედიტაციის გადაწყვეტილების ძალაში შესვლამდე წარდგენილი საგანმანათლებლო პროგრამა ჩაითვლება აკრედიტებულ პროგრამად აკრედიტაციის ვადის გასვლიდან 180 კალენდარული დღის განმავლობაში.