გაყიდვებში 60%-იანი კლება გვაქვს... საქართველომ საავტომობილო ჰაბის ფუნქცია ფაქტობრივად დაკარგა - Carmark
საავტომობილო ინდუსტრიის წარმომადგენლები აცხადებენ, რომ აპრილიდან მთავრობის მიერ ავტომობილებზე განბაჟების ტარიფების მკვეთრ ზრდას ბაზარზე ნეგატიური შედეგები უკვე აქვს.
როგორც Carmark-ის დირექტორმა BMG-ის განუცხადა, 6 წელზე უფრო ძველ ავტომობილებზე აქციზის ზრდის შედეგად მათი კომპანიის გაყიდვები დაახლოებით 60%-ითაა შემცირებული, მათ შორის მკვეთრი კლება ფიქსირდება დილერების მიმართულებით გაყიდვებზე.
ირაკლი კუხიანიძის თქმით, თავის მხრივ აქციზის ზრდას გავლენა აქვს რეექსპორტზეც, რადგან დილერების დიდი ნაწილი, ვინც ამ მიმართულებაზე მუშაობდა, გაზრდილი განბაჟების ტარიფების გამო ახლა გაჩერებულია.
მისი თქმით, შექმნილი ვითარების ფონზე, სულ უფრო მცირდება საქართველოს საავტომობილო ჰაბის ფუნქცია და როლი.
“ახალი კანონის მიღების შემდეგ ძალიან ცუდ დღეში ჩავარდა ეს ბიზნესი და ჩვენი კომპანია მათ შორის, რადგან განბაჟება გაძვირდა, ფაქტობრივად ბაზრიდან გავიდნენ დილერები. დილერები წარმოადგენდნენ ჩვენი გაყიდვების ძირითად ნაწილს. ასევე ფიზიკური პირები, რომლებიც თავისთვის ყიდულობდნენ ავტომობილებს, გათვლილი ჰქონდათ რაღაც ბიუჯეტი, რაშიც უნდა ჩატეულიყვნენ და უნდა ეყიდათ 6 წელზე უფრო ძველი ავტომობილები. შესაბამისად, ისინი უკვე ვეღარ ახერხებენ ამ ავტომობილების ყიდვას. 6 წელზე ახალი ავტომობილები უკვე ძვირი ღირს და ფიზიკურად ვეღარ ახერხებენ ავტომობილების ყიდვას. საერთო ჯამში, ამ ფონზე 60%-იანი ვარდნა გვაქვს გაყიდვებში. შეიძლება ითქვას, გაჩერებულები ვართ. თავდაპირველად მეგონა, რომ ჩემი კომპანიის პრობლემა იყო ეს და მე შემიმცირდა გაყიდვები, მაგრამ კომუნიკაცია მაქვს ჩემს კონკურენტებთან და ყველგან ანალოგიური მდგომარეობა არის.
დილერები გაჩერებულები არიან იმის გამო, რომ რეალურად ამ ბიზნესში გათვლა ასეთია, რომ მათ ავტომობილი ძირითადად ჩამოჰყავთ რეექსპორტზე გასაყიდად. იმ შემთხვევაში, როდესაც ავტომობილს ვეღარ გაყიდიან იმ ვადაში, ვიდრე განბაჟება მოუწევთ რეექსპორტისთვის, იმის შემდეგ უკვე ცდილობენ გაყიდონ ადგილობრივ ბაზარზე.