"გლობალური მიწოდების ჯაჭვების შენარჩუნებისთვის საჭიროა, სტატუს-კვო უცვლელი დარჩეს" - ტაივანის პრეზიდენტი

ტაივანის პრეზიდენტი ლაი ცინდე ტაიბეიში გამართულ ტექნოლოგიურ გამოფენა COMPUTEX-ზე სიტყვით წარდგა და ტექ-სექტორის წამყვან ლიდერებთან არაერთ მნიშვნელოვან საკითხზე ისაუბრა.

მან განსაკუთრებული ყურადღება გლობალური მიწოდების ჯაჭვების წინაშე არსებულ გამოწვევებზე გაამახვილა. ლაის თქმით, არსებული ხაზების უსაფრთხოების უზრუნველსაყოფად წლების განმავლობაში დამკვიდრებული პოლიტიკური სტატუს-კვოს შენარჩუნება აუცილებელია.

ტაივანის ლიდერის განცხადებით, ხელოვნური ინტელექტის განვითარებასთან ერთად, მსოფლიოს სტაბილური, სანდო და პასუხისმგებლიანი ტაივანი სჭირდება, ეს კი ტაივანის სრუტეში მშვიდობისა და სტაბილურობის დაცვის გარეშე ვერ მოხერხდება.

შეგახსენებთ, ტაივანის პოლიტიკური სტატუსი რეგიონში მუდმივი დაპირისპირებისა და რისკების საფუძველია. ჩინეთის ხელისუფლება კუნძულს საკუთარი ტერიტორიის ნაწილად მიიჩნევს, ამერიკის შეერთებული შტატები კი მას ოფიციალური აღიარების გარეშე სრულ მხარდაჭერას უცხადებს.

ცნობისთვის, ტაივანში ჩიპების მსოფლიოში უმსხვილესი კონტრაქტორი მწარმოებელი, კომპანია TSMC-ი მდებარეობს. ის კრიტიკულად მნიშვნელოვანი მოთამაშეა ისეთი გლობალური გიგანტებისთვის, როგორებიც Nvidia და Apple-ი არიან.