გომის მთაზე მეწყერი ჩამოწვა – გზა ყველა სახის ტრანსპორტისთვის იკეტება

გომისმთის გზაზე მეწყერი ჩამოწვა, რის გამოც კურორტთან მისასვლელ გზაზე ტრანსპორტის მოძრაობა შეფერხებულია.

საავტომობილო გზების დეპარტამენტმა BM.GE-ს განუცხადა, რომ გზა ყველა სახის ავტოტრანსპორტისთვის იკეტება. უწყების ცნობით, ადგილზე პარალელურად დაიწყება გაწმენდითი სამუშაოები.

„იკეტება გზა ყველა სახის ავტოტრანსპორტისთვის, პარალელურად დაიწყება გაწმენდითი სამუშაოები და როგორც გაიწმინდება, მყისიერად ამასაც ვამცნობთ საზოგადოებას“, - აცხადებენ საავტომობილო გზების დეპარტამენტში.

შეგახსენებთ, რომ ინფორმაცია მეწყერის ჩამოწოლის შესახებ თავდაპირველად „ბათუმელებმა“ გაავრცელა. მათი ინფორმაციით, მეწყერი დღეს, 7 სექტემბერს, დილის საათებში ჩამოწვა და კურორტთან მისასვლელი გზა ჩაკეტილია. კურორტზე მყოფი მოქალაქეების თქმით, მეწყერი კურორტზე ასასვლელი გზის დაახლოებით შუა ნაწილში ჩამოწვა. ამ დროისთვის ადგილზე სამაშველო სამსახური მუშაობს.