გვინდა, ვაზიანის აეროპორტს პირველივე ფაზაში, 20 მლნ მგზავრის მომსახურების შესაძლებლობა ჰქონდეს - აეროპორტების გაერთიანება
"გვინდა, რომ ვაზიანის აეროპორტს პირველივე ფაზაში, 20 მილიონი მგზავრის მომსახურების შესაძლებლობა ჰქონდეს", - ამის შესახებ BMG-ს საქართველოს აეროპორტების გაერთიანების გენერალურმა დირექტორმა ლევან მოსეშვილმა განუცხადა. მისი თქმით, აეროპორტი ფუნქციონრებას 2032 წლიდან დაიწყებს, რა დროისთვისაც, მას ბევრი მგზავრის ერთდროულად მიღება უნდა შეეძლოს.
„გვინდა, რომ პირველივე ფაზაში, როდესაც აეროპორტი 2032 წლიდან დაიწყებს ფუნქციონირებას, 20 მილიონი მგზავრის მომსახურების შესაძლებლობა ჰქონდეს, რათა შეუფერხებლად მივიღოთ ბევრი მგზავრი, უფრო დიდი საჰაერო ხომალდები, უფრო მეტ ქვეყანასთან იყოს ჩვენი დედაქალაქი დაკავშირებული“ - აცხადებს ლევან მოსეშვილი.
მისივე თქმით, ამ ეტაპზე ტექნიკურ-ეკონომიკური კვლევა გრძელდება, რომლის საფუძველზეც, აეროპორტის მშენებლობა დაიწყება.
რაც შეეხება თბილისის საერთაშორისო აეროპორტის გაფართოებას და „ტავ ჯორჯიას“ მხრიდან დამატებით, 150 მლნ დოლარის ინვესტიციას, აეროპორტების გაერთიანების ხელმძღვანელი ამბობს, რომ ინვესტიციის ფარგლებში სამგზავრო ტერმინალი დაახლოებით 30%-ით გაფართოვდება, რაც აეროპორტს საშუალებას მისცემს, შეუფერხებლად მოემსახუროს წელიწადში 10 მილიონ მგზავრს.
„სააეროპორტო ინფრასტრუქტურის განვითარება საშუალებას მოგვცემს, მივიღოთ მეტი საჰაერო ხომალდი, დავამატოთ ახალი მიმართულებები და მარშრუტები. მზარდი მგზავრთნაკადის ფონზე, ეს იყო დროული გადაწყვეტილება, რაც კიდევ ერთხელ ადასტურებს სახელმწიფოსა და კერძო სექტორს შორის წარმატებულ თანამშრომლობას,“- ამბობს ლევან მოსაშვილი.
შოთა რუსთაველის სახელობის თბილისის საერთაშორისო აეროპორტის გაფართოებისა და მოდერნიზაციის მასშტაბური საინვესტიციო პროექტი ოფიციალურად დაიწყო. პროექტს კომპანია „ტავ ჯორჯია“ ახორციელებს, რომელიც საქართველოში ფრანგული საავიაციო გიგანტის, Groupe ADP-ის წევრის, TAV Airports-ის შვილობილ კომპანიას წარმოადგენს.