GymBreeze და „კოკა-კოლა“ სპორტისა და ჯანსაღი ცხოვრების მხარდასაჭერად გაერთიანდნენ

კომპანია „კოკა-კოლა ბოთლერს ჯორჯია“ სპორტული პროექტის „GymBreeze“-ის მთავარი პარტნიორი გახდა. პარტნიორობის ფარგლებში, კომპანია „კოკა-კოლა ბოთლერს ჯორჯია“ GymBreeze-ის ზაფხულის ლიგაზე ნატურალური მინერალური წყალი “მთის“ ბრენდით და “მთის” ბრენდში შემავალი ყველა პროდუქტით იქნება წარმოდგენილი. მათ შორისაა ნატურალური მინერალური გაზიანი წყალი “მთის”.

GymBreeze-ის ზაფხულის ლიგა 26 მაისს დაიწყო და 7 კვირის განმავლობაში გაგრძელდება. ფინალური ეტაპის შეხვედრები ივლისის შუა რიცხვებში გაიმართება. ლიგის თამაშებს საქართველოს პადელის ფედერაციის არბიტრები გაუძღვებიან. ტურნირი როგორც მოყვარულ, ისე პროფესიონალ მოთამაშეებს გააერთიანებს და მონაწილეებს კონკურენტულ, დინამიურ და მაღალი სტანდარტის სპორტულ გამოცდილებას შესთავაზებს.

„კოკა-კოლა“ უკვე მრავალი წელია სპორტის განვითარების ერთ-ერთი ყველაზე აქტიური მხარდამჭერია როგორც მსოფლიოში, ისე საქართველოში. კომპანია მუდმივად დგას ყველა იმ ინიციატივის გვერდით, რომელიც ჯანსაღი ცხოვრების წესის პოპულარიზაციას, ახალგაზრდების მხარდაჭერასა და სპორტული კულტურის განვითარებას ემსახურება. მსოფლიო ბრენდის მისიაა, რომ შექმნას ისეთი გარემო, სადაც სპორტი ადამიანებს აერთიანებს, ახალ შესაძლებლობებს აჩენს და აქტიური ცხოვრების წესს ამკვიდრებს. GymBreeze-თან პარტნიორობაც სწორედ ამ ხედვის გაგრძელებაა - სწრაფად მზარდი სპორტის მხარდაჭერა და ჯანსაღი ცხოვრების წესის დანერგვა.

GymBreeze-ის შესახებ

GymBreeze ექსპერიმენტული ბრენდია, რომელიც ჯანსაღი ცხოვრებისა და გართობის კონცეფციას აერთიანებს. ქმნის მეგობრულ გარემოს ადამიანებისთვის, რომლებსაც აქტიური ცხოვრების სტილი და სპორტი აერთიანებთ. მისი მთავარი მიზანი საერთო ინტერესების ირგვლივ სოციალიზაციის, სპორტული აქტივობებისა და ახალი სპორტული კულტურის განვითარების ხელშეწყობაა.

GymBreeze საქართველოში ყველაზე დიდი პადელის სივრცეა. ბრენდი ნინოშვილის ქუჩასა და რადიო ქალაქის ტერიტორიაზე 12 ღია კორტს აერთიანებს. უახლოეს პერიოდში სპორტის სასახლეში კიდევ 4 დახურული კორტი დაემატება, სადაც დილის ვარჯიშები, ამხანაგური თამაშები და სხვადასხვა ფორმატისა და მასშტაბის ტურნირები გაიმართება.

15 000-ზე მეტი მოთამაშითა და აპლიკაციის 14 000-ზე მეტი მომხმარებლით, GymBreeze საქართველოში ერთ-ერთ ყველაზე სწრაფად მზარდ სპორტულ საზოგადოებად ჩამოყალიბდა. მისი კორტები მხოლოდ სათამაშო სივრცე არ არის - ეს არის ადგილი, სადაც სპორტის მოყვარულები, მეგობრები და გულშემატკივრები ერთმანეთს ხვდებიან, ურთიერთობენ და საერთო გამოცდილებას ქმნიან.

პადელი - საჩოგნო სპორტი

პადელი საჩოგნო სპორტია, რომელმაც ბოლო წლებში მსოფლიოში განსაკუთრებული პოპულარობა მოიპოვა და სწრაფად ვითარდება საქართველოშიც. GymBreeze-ისა და „კოკა-კოლას“ საერთო მიზანი ამ სპორტის როგორც პროფესიონალური, ისე სამოყვარულო მიმართულებით პოპულარიზაციაა, რადგან პადელი რეალურად ყველასთვის ხელმისაწვდომი სპორტია.

თამაშის სწავლა მარტივია, რაც მას ნებისმიერი ასაკისა თუ გამოცდილების ადამიანისთვის სასურველ სპორტად აქცევს. პადელი აერთიანებს ფიზიკურ აქტივობას, გართობას, ჯანსაღ კონკურენციასა და მეგობრებთან ერთად დროის საინტერესოდ გატარების შესაძლებლობას. ამ სპორტის სახეობის კიდევ ერთი მნიშვნელოვანი უპირატესობა ისაა, რომ თამაში წლის ნებისმიერ სეზონზეა შესაძლებელი. პადელი ერთდროულად ქმნის გართობის, სტრატეგიული აზროვნებისა და სპორტული უნარების განვითარების შესაძლებლობას.