ჰაკერებმა კენიის პრეზიდენტის ვებგვერდი გატეხეს და გამოსასყიდი მოითხოვეს

ჰაკერებმა კენიის პრეზიდენტის უილიამ რუტოს ოფიციალური ვებგვერდი (president.go.ke) გატეხეს და 5 ბიტკოინის ოდენობით (დაახლოებით 41 მილიონი კენიური შილინგი) გამოსასყიდი მოითხოვეს. კენიის ხელისუფლებამ დაადასტურა კიბერშეტევა და განაცხადა, რომ მგრძნობიარე მონაცემების უნებართვო წვდომის ან გაჟონვის ნიშნები ამ ეტაპზე არ გამოვლენილა.

კიბერშეტევა, რომელმაც დროებით დააზიანა პრეზიდენტის ოფიციალური ვებპორტალის მუშაობა, ბოლოა იმ გახმაურებული კიბერშეტევების სერიიდან, რომლებიც სახელმწიფო ციფრულ ინფრასტრუქტურას მიზანში იღებს იმ ფონზე, როდესაც კენია საჯარო სერვისების ონლაინ მიწოდებას აქტიურად აფართოებს.

მედიის ინფორმაციით, თავდამსხმელებმა ვებგვერდის ნაწილი გამოსასყიდის მოთხოვნის შეტყობინებით ჩაანაცვლეს და წვდომის აღდგენამდე კრიპტოვალუტაში გადახდა მოითხოვეს.

ინციდენტმა კვლავ გაააქტიურა დისკუსია სახელმწიფო ვებგვერდების უსაფრთხოებისა და იმის შესახებ, ახლავს თუ არა კენიის ციფრულ ტრანსფორმაციას კიბერუსაფრთხოებაში შესაბამისი და საკმარისი ინვესტიციები.

არსებული ინფორმაციით, კენიის მთავრობის კიბერუსაფრთხოების ჯგუფებმა ვებგვერდზე წვდომა დროებით შეზღუდეს, მიმდინარეობს სისტემის აღდგენისა და ინციდენტის გამოძიების პროცესი.