ჰორმუზის სრუტეში გემების გადაადგილება მკვეთრად გაიზარდა

აშშ-სა და ირანს შორის ივნისში გაფორმებული შეთანხმების შემდეგ ჰორმუზის სრუტეში გემების მიმოსვლა მნიშვნელოვნად გაიზარდა. არსებული ინფორმაციით, 28 ივნისის კვირაში ყურეში შესული და გამოსული ხომალდების საერთო რაოდენობამ 258 შეადგინა. ეს მონაცემი მარტში, კრიზისის პირველ კვირას დაფიქსირებულ 41 ტრანზიტთან შედარებით მკვეთრ ზრდაზე მიუთითებს.

თუ კონფლიქტის პერიოდში ყურეში დღეში მხოლოდ 1 ან 2 ხომალდი შედიოდა, 1 ივლისის მონაცემებით ამ რიცხვმა 30-50 ერთეულს მიაღწია. როგორც მედია წერს, ეს ტემპი იმით არის განპირობებული, რომ საზღვაო ოპერატორები შექმნილი, შედარებით წყნარი პერიოდით სარგებლობას ცდილობენ.

რაც შეეხება უსაფრთხო გადაადგილების მარშრუტებს, საყურადღებოა, რომ ამ მხრივ ოპერატორებს დიდი არჩევანი არ აქვთ. სრუტეში არსებული ორივე მთავარი საზღვაო გზა დანაღმულია. რაც შეეხება არსებულ ალტერნატივებს, ერთი მარშრუტი ირანის სანაპიროს მიუყვება და მას სწორედ თეირანი აკონტროლებს, მეორე გზა კი ომანის სანაპიროზე გადის. საყურადღებოა, რომ ირანული მარშრუტით გადაადგილება "ისლამური რევოლუციის გუშაგთა კორპუსის" თანხმობას ყოველ ჯერზე მოითხოვს, სამხრეთის დერეფანში კი ხომალდების საჰაერო თავდაცვას აშშ და ომანი უზრუნველყოფენ.

ცნობისთვის, მიმდინარე კონფლიქტის დაწყებამდე ჰორმუზის სრუტე სრულიად თავისუფალი და საფრთხის არმქონე საზღვაო მარშრუტი იყო, რომელზეც მსოფლიო ნავთობისა და გაზის დაახლოებით მეხუთედი ნაწილი გადიოდა.