ჰორმუზის სრუტეში საზღვაო მიმოსვლა მკვეთრად შემცირდა

ახლო აღმოსავლეთში კონფლიქტის ესკალაციის ფონზე, ჰორმუზის სრუტეში კომერციული გემების გადაადგილება კიდევ უფრო მეტად შემცირდა. ანალიტიკური კომპანია Kpler-ის მონაცემებით, ორშაბათს სრუტე მხოლოდ ოთხმა სატვირთო გემმა გადაკვეთა, მაშინ როდესაც წინა დღეს ეს მაჩვენებელი ათს შეადგენდა.

არსებული ინფორმაციით, სრუტიდან ორი მშრალი ტვირთის გადამზიდი ხომალდი გამოვიდა, ხოლო ორი ნავთობტანკერი - შევიდა. უნდა აღინიშნოს, რომ ამ სტატისტიკაში არ შედიან ის გემები, რომლებიც უსაფრთხოების რისკების გამო საიდენტიფიკაციო სისტემებს თიშავენ და გადაადგილებას ფარულად ახორციელებენ.

ამას გარდა, გემების მოძრაობის კლება დაფიქსირდა ბაბ-ელ-მანდების სრუტეშიც, სადაც Kpler-ის მონაცემებით, ტრანზიტი 28-დან 21 ერთეულამდე შემცირდა.

შეგახსენებთ, მიმდინარე წლის 28 თებერვალს ირანის ომის დაწყებამდე, ჰორმუზის სრუტეს ყოველდღიურად საშუალოდ 125 მსხვილი კომერციული ხომალდი გადიოდა.