I კვარტალში ადგილობრივი ტურიზმის გაიზარდა

საქსტატის ინფორმაციით, მიმდინარე წლის პირველ კვარტალში ადგილობრივი ვიზიტორების საშუალო თვიური რაოდენობა თითქმის 1.3 მლნ იყო, რომელთაც ქვეყნის ტერიტორიაზე 1.6 მლნ-მდე ვიზიტი განახორციელეს.

ვიზიტორების საშუალო თვიური რაოდენობა 2%-ით გაიზარდა, ხოლო მათ მიერ განხორციელებული ვიზიტების რაოდენობა 5%-ით მეტია წინა წლის ანალოგიური პერიოდის მაჩვენებელზე.

ასევე 6.6%-ით 665 ათასამდე გაზრდილია ტურისტული ტიპის ვიზიტების საშუალო თვიური რაოდენობა.

მიმდინარე წლის პირველ კვარტალში ყველაზე მეტი ვიზიტი განხორციელდა თბილისში (საშუალოდ 415 ათასი) და იმერეთის რეგიონში (საშუალოდ 322.4 ათასი).

ამას გარდა, განხორციელებული ვიზიტებისას გაწეული საშუალო თვიური ხარჯების მოცულობა განისაზღვრა 273.6 მლნ ლარით, რაც 13%-ით მეტია გასული წლის ანალოგიური პერიოდის მაჩვენებელზე. ამასთან, ერთ ვიზიტზე გაწეული საშუალო ხარჯი 7.4%-ით 172.7 ლარამდე გაიზარდა.