იაპონური იენი 40-წლიან მინიმუმამდე გაუფასურდა

იაპონური იენი ამერიკულ დოლართან მიმართებით 1986 წლის შემდეგ ყველაზე დაბალ ნიშნულამდე გაუფასურდა, რამაც ინვესტორებში ხელისუფლების მხრიდან სავალუტო ინტერვენციის განხორციელების მოლოდინი გააძლიერა. ამჟამინდელი მონაცემებით, იენის კურსი დოლართან მიმართებით 162.2-ს შეადგენს.

როგორც ირკვევა, ქვეყნის ფინანსთა მინისტრმა, საცუკი კატაიამამ და მინისტრთა კაბინეტის მთავარმა მდივანმა, მინორუ კიჰარამ ბაზარზე მკაცრი ზომების გატარების მზადყოფნა დაადასტურეს. Nomura-ს წარმომადგენლის, ჯულია ვანგის შეფასებით, ვალუტის მკვეთრი ვარდნა ქვეყანაში შეშფოთებას იწვევს, თუმცა ინტერვენციის გავლენა ხანმოკლე იქნება. ამასთან, იენის პერსპექტივა სუსტი რჩება, რადგან აშშ-სა და იაპონიას შორის საპროცენტო განაკვეთების სხვაობა კაპიტალის გადინებას უწყობს ხელს.

აღსანიშნავია, რომ ვალუტის გაუფასურების პარალელურად, იაპონიის სახელმწიფო ობლიგაციების შემოსავლიანობა მკვეთრად გაიზარდა. კერძოდ, 40-წლიანი ობლიგაციების შემოსავლიანობამ 3.78% შეადგინა, ხოლო 30-წლიანი ფასიანი ქაღალდების მაჩვენებელი 3.91%-მდე გაიზარდა.

შეგახსენებთ, რომ მიმდინარე წლის აპრილსა და მაისში იაპონიამ ეროვნული ვალუტის მხარდასაჭერად რეზერვებიდან $72.8 მილიარდი დახარჯა. ამას გარდა, იაპონიის ცენტრალურმა ბანკმა ბაზრის ნორმალიზაციის ფარგლებში რეფინანსირების განაკვეთი 1%-მდე გაზარდა.

ცნობისთვის, 1 ლარის კურსი იაპონურ ვალუტასთან მიმართებით 61.5 იენს შეადგენს.