ილჰამ ალიევმა ევროპარლამენტს კორუმპირებული ფიგურების ბუდე უწოდა

აზერბაიჯანის პრეზიდენტმა, ილჰამ ალიევმა ევროპარლამენტი მწვავედ გააკრიტიკა და ინსტიტუტს „კორუმპირებული ფიგურების ბუდე“ უწოდა. როგორც ირკვევა, ბაქოში გამართულ საერთაშორისო კონფერენციების მონაწილეებთან შეხვედრისას ქვეყნის ლიდერმა დასავლური სტრუქტურები ორმაგ სტანდარტებსა და ისლამოფობიაში დაადანაშაულა.

ალიევის განცხადებით, ევროპული ორგანიზაციები წლების განმავლობაში აზერბაიჯანის რეპუტაციის შელახვას მიზანმიმართულად ცდილობდნენ. აზერბაიჯანის ლიდერმა ყურადღება გაამახვილა დასავლური მედიის იმ კამპანიაზე, რომელიც მიზნად ქვეყნის წინააღმდეგ ცილისმწამებლური სტატიების გავრცელებას ისახავს. პრეზიდენტის თქმით, ეს პროცესი ბაქოს გაძლიერებული საერთაშორისო პოზიციების დისკრედიტაციას ემსახურება.

ამასთან, აზერბაიჯანის პრეზიდენტმა ევროპარლამენტის ყოფილი ვიცე-პრეზიდენტის ირგვლივ განვითარებული კორუფციული სკანდალი გაიხსენა. ალიევის თქმით, საბერძნეთის წარმომადგენელი დეპუტატის სახლში სამართალდამცავებმა მილიონობით დოლარით სავსე ჩემოდნები იპოვეს. აზერბაიჯანის ლიდერმა აღნიშნა, რომ ევროპულმა სტრუქტურებმა ეს მძიმე ფაქტი სრულად მიჩქმალეს. პრეზიდენტის განცხადებით, ბრალდებული პირი პასუხისმგებლობას გადაურჩა და იგი საპატიმროდან მალევე გაათავისუფლეს. ალიევმა ხაზი გაუსვა იმ გარემოებას, რომ ევროპარლამენტი მიკერძოებული ფიგურებისგან შედგება.

რაც შეეხება ევროსაბჭოსთან ურთიერთობის ისტორიას, ალიევმა ორგანიზაციის მხრიდან გამოვლენილ უსამართლო მიდგომებზე ისაუბრა. პრეზიდენტის განცხადებით, ბაქო სამი ათწლეულის განმავლობაში უშედეგოდ ითხოვდა სომხეთის აგრესორად ოფიციალურად გამოცხადებას. ამას გარდა, აზერბაიჯანის ლიდერმა აღნიშნა, რომ ევროპულ სტრუქტურებს ერევნისთვის სანქციები არასდროს დაუწესებიათ. პრეზიდენტის თქმით, საერთაშორისო ინსტიტუტებმა სანქციების მექანიზმი ყარაბაღში მხოლოდ სეპარატიზმის აღმოფხვრის შემდეგ აამოქმედეს. ალიევმა განმარტა, რომ ევროპული ორგანიზაციების ეს პოზიცია რეალურ პოლიტიკურ მიკერძოებას ადასტურებს.