ინფრასტრუქტურის მინისტრმა მსოფლიო ბანკთან ახალი ინიციატივების ფინანსური მხარდაჭერის შესაძლებლობები განიხილა|სამინისტრო

საქართველოს ინფრასტრუქტურის მინისტრი რევაზ სოხაძე მსოფლიო ბანკის მაღალჩინოსნებს შეხვდა, სადაც ახალი ინფრასტრუქტურული ინიციატივების ფინანსური მხარდაჭერის შესაძლებლობები განიხილეს. ამის შესახებ ინფორმაციას ინფრასტრუქტურის სამინისტრო ავრცელებს.

უწყების ცნობით, შეხვედრას მსოფლიო ბანკის ევროპისა და ცენტრალური აზიის მდგრადი განვითარების რეგიონული დირექტორი სამეჰ ნაგიბ ვაჰბა, სამხრეთ კავკასიაში მსოფლიო ბანკის რეგიონული დირექტორი როლანდ პრაისი და წყალმომარაგებისა და წყალარინების სპეციალისტი სვენ შლუმბერგერი ესწრებოდა. გარდა ამისა, შეხვედრაში მონაწილეობა ინფრასტრუქტურის მინისტრის მოადგილეებმა მზია გიორგობიანმა და გიორგი კობერიძემ მიიღეს, ასევე გაერთიანებული წყალმომარაგების კომპანიის დირექტორის მოადგილემ ბესიკ ჯიქურაულმა.

შეხვედრაზე რევაზ სოხაძემ სტუმრებს სამინისტროს საქმიანობის ძირითადი მიმართულებები გააცნო და ყურადღება გაამახვილა მიმდინარე და დაგეგმილ ინფრასტრუქტურულ პროექტებზე, რომლებიც რეგიონებში თანამედროვე სტანდარტების წყალმომარაგებისა და წყალარინების სისტემების ხელმისაწვდომობის გაუმჯობესებას ისახავს მიზნად.

მხარეებმა დეტალურად განიხილეს წყალმომარაგებისა და წყალარინების მიმართულებით არსებული და სამომავლო პროექტები და იმსჯელეს ახალი ინფრასტრუქტურული ინიციატივების დაფინანსების შესაძლო მექანიზმებზე. შეხვედრაზე ხაზგასმით აღინიშნა მსოფლიო ბანკის როლი საქართველოს ინფრასტრუქტურის განვითარების პროცესში და შეჯამდა უკვე განხორციელებული პროექტების შედეგები.

რევაზ სოხაძემ მსოფლიო ბანკის წარმომადგენლებს მრავალწლიანი თანამშრომლობისა და მხარდაჭერისთვის მადლობა გადაუხადა. მხარეებმა დაადასტურეს მზადყოფნა, კიდევ უფრო გააღრმაონ პარტნიორობა და უზრუნველყონ როგორც მიმდინარე, ისე დაგეგმილი პროექტების ეფექტიანი განხორციელება.