Intel-მა ისრაელური კვანტური კომპანია $2.2 მილიარდად შეიძინა

ამერიკულმა ტექნოლოგიურმა გიგანტმა, Intel-მა კვანტური გამოთვლითი პროგრამული უზრუნველყოფის მწარმოებელი ისრაელური კომპანია Classiq-ი $2.2 მილიარდად შეისყიდა.

ისრაელის ბაზარზე Intel-ისთვის ეს Mobileye-ის $15.3 მილიარდად შეძენის შემდეგ რიგით მეორე ყველაზე მასშტაბური ტრანზაქციაა და ამ ნაბიჯით კომპანია ოპერაციული სისტემების ახალ ბაზარზე შედის.

დარგის ანალიტიკოსთა შეფასებით, ეს სტრატეგია Google-ის მიერ სმარტფონების ეპოქაში Android-ის ისტორიულ შესყიდვას ჰგავს. მიღწეული შეთანხმებით, თელ-ავივში დაფუძნებული სტარტაპი კვანტური ტექნოლოგიების მიმართულებით Intel-ის გლობალურ ცენტრად გარდაიქმნება.

მნიშვნელოვანია ითქვას, რომ Classiq-ი საკუთარ თავს კვანტური სამყაროს Microsoft-ს უწოდებს. კომპანიამ შექმნა ოპერაციული სისტემა, რომელიც სხვადასხვა ტიპის კვანტურ კომპიუტერზე რთული ალგორითმების შესრულებას უზრუნველყოფს. Classiq-ის პროგრამული უზრუნველყოფა სპეციალიზებულ პროცესორებზე მუშაობს და იონურ, ფოტონურ თუ ზეგამტარ სისტემებთან სრულ თავსებადობას ინარჩუნებს.

ამ პლატფორმას თავისი ავტომობილების სიმულაციისთვის BMW იყენებს, საბანკო სექტორში კი თაღლითობის გამოსავლენად HSBC და Intesa Sanpaolo მიმართავენ. ამას გარდა, დასახელებულ სისტემას Citibank-ი, Deloitte-ი, Rolls Royce-ი და 600-ზე მეტი აკადემიური ინსტიტუტი აქტიურად იყენებს.

ცნობისთვის, Classiq-ი 2020 წელს დაფუძნდა და მას შემდეგ ჯამურად $200 მილიონის მოზიდვა შეძლო.