"ინვესტიციების და ექსპორტის სააგენტოში" "აწარმოე საქართველოდან" 19 თანამშრომელი და ₾17 მლნ გადავა

პარლამენტში დღეს დაჩქარებული წესით დარეგისტრირდა საჯარო კერძო თანამშრომლობის (PPP) სააგენტოს რეორგანიზაციის კანონპროექტი.

აღნიშნული უწყება ამჟამად მთავრობის ადმინისტრაციის დაქვემდებარებაშია და ის კანონის მიღების შემდეგ ეკონომიკის სამინისტროში გადაინაცვლებს, ასევე შეიცვლება მისი სახელი და ფუნქციები - კერძოდ კი მის საფუძველზე "ინვესტიციების და ექსპორტის სააგენტო" დაფუძნდება, ხოლო აღნიშნულ სააგენტოში თანამშრომლები ეკონომიკის სამინისტროს სხვა სსიპ-იდან "აწარმოე საქართველოშიდან" გადაინაცვლებენ.

დღესვე საკანონმდებლო მაცნეზე გამოქვეყნდა პრემიერ-მინისტრ ირაკლი კობახიძის ბრძანება, რომლის მიხედვითაც საჯარო კერძო თანამშრომლობის სააგენტოს უფროსად მიხეილ ხიდურელი დაინიშნა.

კანონპროექტის განმარტებითი ბარათის თანახმად, თუკი PPP სააგენტოს ბიუჯეტი აქამდე 0.7 მლნ ლარით იყო განსაზღვრული, რეფორმირების შემდეგ მასში სსიპ "აწარმოე საქართველოში"-დან 19 თანამშრომელი და დაახლოებით 16.7 მლნ ლარის ბიუჯეტი გადავა.

"მოხდება სსიპ-ის „აწარმოე საქართველოში“ დასაქმებული თანამშრომლების (19 თანამშრომელი), რომლებიც დღეს ახორციელებენ ინვესტიციებისა და ექსპორტის მიმართულებით შესაბამის ფუნქციებს, იმავე პირობებით გადაყვანა სააგენტოში, შესაბამისად კანონპროექტს არ მოჰყვება ფინანსური შედეგები იმ პირთათვის, რომელთა მიმართაც ვრცელდება კანონპროექტის მოქმედება,"- ნათქვამია კანონპროექტის განმარტებით ბარათში.

პარლამენტში აღნიშნული კანონპროექტის დაჩქარებული წესით მოსმენას მიხეილ ხიდურელიც ესწრებოდა, თუმცა განხილვისას არ თქმულა რომ ამ სააგენტოს უფროსი თავად ხიდურელი იქნებოდა.

ეს დეპარტამენტი დაფუძნდება სსიპ "აწარმოე საქართველოში"-დან ექსპორტის და ინვესტიციების კომპონენტის გამოტანით და მთავრობის ადმინისტრაციიდან სსიპ საჯარო და კერძო თანამშრომლობის სააგენტოს ეკონომიკის სამინისტროში გადატანით. გადატანის შემდეგ სააგენტოს სახელი შეეცვლება და მასში გადაინაცვლებს "აწარმოე საქართველოში"-ს გუნდი, რომელიც ინვესტიციების და ექსპორტის მხარდაჭერის დეპარტამენტში საქმიანობდა.