ინვესტიციების სწორი მართვით, მესტიაში სტაბილური ენერგომომარაგების აღდგენა სავსებით რეალურია - გია არაბიძე
"ინვესტიციების სწორი მართვით, მესტიაში სტაბილური ენერგომომარაგების აღდგენა სავსებით რეალურია", - ამის შესახებ BMG-სთან ენერგეტიკოსი გია არაბიძე საუბრობს.
მისი თქმით, იმ შემთხვევაში, თუ გამანაწილებელ კომპანიას დამატებითი ფინანსების მოძიება გაუჭირდება, სახელმწიფომ და ენერგოკომპანიამ მესტიის გამრიცხველიანება პრიორიტეტად უნდა აქციონ.
„ახალი სამომხმარებლო ტარიფის დადგენის დროს ინვესტიციები უკვე შეითანხმა სემეკმა. ამ ინვესტიციებში ერთ-ერთი მნიშვნელოვანი პუნქტი ჭკვიანი მრიცხველების დაყენებაა, ანუ გამრიცხველიანების პროცესი ისედაც მიმდინარეობს... თუ რაღაც პრობლემები შეიქმნა, მე მიმაჩნია, რომ გარკვეულწილად, შეიძლება სხვა რეგიონების გამრიცხველიანების პროცესი შენელდეს ან შეჩერდეს და მესტია ავიღოთ პირველ ადგილზე“ - აცხადებს გია არაბიძე BMG-სთან.
მისივე შეფასებით, მიუხედავად იმისა, რომ მესტიის ენერგოინფრასტრუქტურა მოძველებულია, მას რეალურად აქვს რესურსი, რეგიონის ნამდვილი საჭიროებები დააკმაყოფილოს, თუკი ელექტროენერგიის არამიზნობრივი ხარჯვა და დატაცება გამოირიცხება.
„ინფრასტრუქტურა, რომელიც დღეს მესტიაში არსებობს - ცოტა მოძველებულია, გასაკეთებელია, გასაახლებელია - მაგრამ მას შეუძლია, დაახლოებით, იმ რაოდენობის ელექტროენერგია გაატაროს, რაც ნამდვილად სჭირდება მესტიას. ეს პრობლემა არ არის და „ენერგო-პრო ჯორჯია“ შეძლებს ამის მიწოდებასა და მოსახლეობის ელექტროენერგიით დაკმაყოფილებას “, - განმარტავს არაბიძე.
ამასთან, მისივე თქმით, ენერგოსისტემაში ჩადებული ყოველი ლარი პირდაპირ აისახება რეგიონის ეკონომიკურ სიჯანსაღეზე. გარდა ამისა, გია არაბიძის თქმით, სახელმწიფომ უნდა დათვალოს სოციალური მინიმუმი, რომელსაც მოსახლეობა უფასოდ ან შეღავათიანი პირობებით მიიღებს, ხოლო ბიზნესმა ენერგიის საფასური სრულად უნდა დაფაროს.
„ყაზბეგში გაზთან დაკავშირებითაც იყო პრობლემები - როდესაც გაზის მოწოდება აღდგა, ძალიან სერიოზული დატაცება იყო, თითქმის, არ არსებობდა მოსახლე რომ სათბურები არ გაეკეთებინათ - პირდაპირ ამ სათბურებში შედიოდა გაზი მილებით და ასე შემდეგ. გადაწყდა პრობლემა - დათვალეს, თუ რა რაოდენობის გაზი შეიძლებოდა ერთ ოჯახს მიწოდებოდა, რომ სოციალურად დაცული ყოფილიყვნენ ზამთარშიც და ზაფხულშიც, განისაზღვრა ეს ციფრი და ეს ლიმიტი მუშაობს დღესაც. ამის ზემოთ მოიხმარ - გადაიხდი. ანალოგიურად, აქაც შეიძლება ამის დათვლა. ზამთრის პერიოდში ბუნებრივია, გაცილებით მეტი იქნება მოხმარება ვიდრე ზაფხულის პერიოდში. შეიძლება დიფერენცირებული მოხმარება იყოს, ზაფხულის პერიოდში უფრო ნაკლები, ზამთარში - უფრო მეტი, ყოველ შემთხვევაში, ეს დათვლადია.