ინვესტორები მსხვილი ჰესებით დაინტერესებულები არიან - დავით ნარმანია
სემეკის თავმჯდომარე დავით ნარმანია მსხვილი ჰესების მიმართ ინვესტორების მხრიდან არსებულ ინტერესის შესახებ აცხადებს და ამბობს, რომ საბოლოო გადაწყვეტილება კონკრეტულ ინვესტორთან მიმართებით ჯერ მიღებული არ არის. ამის შესახებ მან BMG-ის კითხვის საპასუხოდ განაცხადა, რომელიც სახელმწიფოს მიერ მსხვილ ჰესებთან დაკავშირებით ინვესტორების მოძიებას შეეხებოდა.
„დაინტერესებული ინვესტორები არიან, ისინი მართავენ სხვადასხვა შეხვედრას, აკეთებენ თავიანთ გაანგარიშებებს, მათ შორის მოდიან ჩვენთანაც და ინტერესდებიან მარეგულირებელი წესებით, ნორმებითა და პროცედურებით. ეს ცოცხალი პროცესია.
რამდენადაც ჩემთვის ცნობილია, კონკრეტული ინვესტორის შესახებ საბოლოო გადაწყვეტილება ჯერჯერობით მიღებული არ არის, თუმცა როგორც კი მივიღებთ, პროცესი, რა თქმა უნდა, საჯარო გახდება და დაინტერესებული საზოგადოება ამას თქვენი მეშვეობით შეიტყობს.
როგორც წესი, ინტერესი ყველა პროექტის მიმართ არსებობს, შესაბამისად, ისინი კითხულობენ ამა თუ იმ პროექტის სტატუსს, არსებულ მდგომარეობას, მარეგულირებელ გარემოს, ტარიფებსა და სხვა მრავალ დეტალს, რაც შემდგომში ანალიზის გაკეთებასა და სამომავლო გადაწყვეტილების მიღებაში ეხმარებათ", - აცხადებს ნარმანია.
BM.GE
წყარო: bm.ge