ირაკლი კობახიძე აშშ-ში გაემგზავრა|24 სექტემბერს გაეროში სიტყვით გამოვა

ირაკლი კობახიძე გაეროს გენერალური ასამბლეის 81-ე სესიაში მიიღებს მონაწილეობას. გენერალური ასამბლეის გენერალურ დებატებზე საქართველოს მთავრობის მეთაური სიტყვით 24 სექტემბერს გამოვა - ინფორმაციას მთავრობის ადმინისტრაცია ავრცელებს.

უწყება წერს, რომ ნიუ-იორკში ვიზიტის ფარგლებში, პრემიერ-მინისტრი ასევე მიიღებს მონაწილეობას „მრავალმხრივი პარტნიორობის“ სამიტში. გარდა ამისა, იგი დაესწრება ფინეთის მიერ ორგანიზებულ მაღალი დონის პანელურ დისკუსიას, რომელიც მშვიდობის საკითხებს ეძღვნება.

ვიზიტის ფარგლებში დაგეგმილია ირაკლი კობახიძის ორმხრივი შეხვედრები სხვადასხვა სახელმწიფოს ლიდერებთან, ასევე გაეროს გენერალურ მდივან ანტონიო გუტიერეშთან.

დელეგაციის შემადგენლობაში არიან ვიცე-პრემიერი, საგარეო საქმეთა მინისტრი მაკა ბოჭორიშვილი და მთავრობის ადმინისტრაციის უფროსი ლევან ჟორჟოლიანი.

შეგახსენებთ, კობახიძე ბოლოს გაეროში 2024 წელს გამოვიდა, 2025 წელს კი გაეროს ასამბლეაზე სიტყვით მიხეილ ყაველაშვილი გამოვიდა და დაახლოებით 10 წუთი ისაუბრა ქართულ ენაზე.