ირაკლი კობახიძე იურიდიული დახმარების სამსახურის ახლად დანიშნულ დირექტორს შეხვდა
"ოცნების" პრემიერ-მინისტრი ირაკლი კობახიძე იურიდიული დახმარების სამსახურის ახლად დანიშნულ დირექტორს ოთარ ჩახუნაშვილს შეხვდა.
ოთარ ჩახუნაშვილი დირექტორად ირაკლი კობახიძის ბრძანებით პირველი მაისიდან დაინიშნა.
შეხვედრის შესახებ ირაკლი კობახიძემ სოციალურ ქსელში დაწერა.
"იურიდიული დახმარების სამსახურის ახლად დანიშნულ დირექტორს ოთარ ჩახუნაშვილს შევხვდი.
სამსახურის ახალ ხელმძღვანელს თანამდებობაზე დანიშვნა მივულოცე და წარმატებები ვუსურვე.
ოთარ ჩახუნაშვილმა სამსახურის საქმიანობის ძირითად მიმართულებებსა და პრიორიტეტებზე დეტალური ინფორმაცია მომაწოდა.
სსიპ იურიდიული დახმარების სამსახური მოქალაქეებისთვის უფასო სამართლებრივი დახმარების ხელმისაწვდომობას უზრუნველყოფს.
ოთარ ჩახუნაშვილი სამსახურის დირექტორად ჩემი ბრძანებით პირველი მაისიდან დაინიშნა. მას საჯარო სექტორში მუშაობის მრავალწლიანი გამოცდილება აქვს. სხვადასხვა პერიოდში ოთარ ჩახუნაშვილი იყო პერსონალურ მონაცემთა დაცვის სამსახურის უფროსის პირველი მოადგილე, იუსტიციის სახლის აღმასრულებელი დირექტორი, თავდაცვის სამინისტროს რეფორმების კოორდინაციისა და მონიტორინგის დეპარტამენტის უფროსი, ასევე ხელმძღვანელობდა სახელმწიფო ინსპექტორის სამსახურის საჯარო და კერძო სექტორზე ზედამხედველობის დეპარტამენტს. ოთარ ჩახუნაშვილი არის სამართლის დოქტორი",- წერს ირაკლი კობახიძე სოციალურ ქსელში.
შეგახსენებთ, "იურიდიული დახმარების შესახებ" კანონში შესული ცვლილებებით, იურიდიული დახმარების სამსახური ანგარიშვალდებული გახდა პრემიერ-მინისტრის წინაშე და მასვე მიენიჭა დანიშვნისა და მოხსნის დისკრეცია. განსხვავებით მანამდე მოქმედი კანონისგან, რომლითაც იურიდიული სამსახური არ ექვემდებარებოდა არცერთ სახელმწიფო ორგანოს და ანგარიშვალდებული იყო მხოლოდ პარლამენტის წინაშე.
BM.GE
წყარო: bm.ge